نەتەنیاهۆ کوشتنی براکەی یەحیا سینواری لە غەززە ڕاگەیاند

ئاڤا نیوز

ئیسرائیل کوشتنی یەکێک لە سەرکردە دیارەکانی حەماسی پشتڕاست کردەوە و نەتانیاهۆش دەڵێت، هێشتا 20 بارمتەیان لە غەززە ماون.

چیرۆکی سەرەکی: بە گوێرەی میدیاکانی ئیسرائیل، ڕۆژی 13ـی ئەم مانگە لە بۆردوومانێکی ئیسرائیلدا بۆ سەر نەخۆشخانەی ئەوروپی غەززە، محەمەد سینوار یەکێک لە سەرکردە سەربازییەکانی حەماس کوژراوە

لێدوانی فەرمی: لە وتارێکیدا لە بەردەم پەرلەمانی وڵاتەکەی بنیامین نەتانیاهۆ، سەرۆکوەزیرانی ئیسرائیل ڕایگەیاند، سوپای ئیسرائیل توانیویەتی محەمەد سینوار بەرپرسی حەماس لە کەرتی غەززە بکوژێت.

زانیاریی زیاتر: نەتەنیاهۆ وتیشی، هێشتا 20 بارمتە و تەرمی 38 بارمتەی دیکەی ئیسرائیل لە غەززەیە، ئەگەر بەو شێوەیە کارمان بکردایە کە ئۆپۆزسیۆن دەیەوێت، ئیسرائیل شەڕەکەی دەدۆڕاند و حەماس براوە دەبوو.

بۆچوونی لایەنی بەرامبەر: حەماس کوشتنی محەممەد سینواری پشتڕاست نەکردووەتەوە و لە بارەی پێشنیازی ئەمریکاوە ڕایگەیاند، چاوەڕوانی وەڵامی کۆتایی بۆ ئەو چوارچێوە گشتیە دەکەن کە لەگەڵ ستیڤ ویتکۆف نوێنەری ئەمریکا لەسەری ڕێککەوتوون. 

ئەوەی پێویستە بیزانیت: محەممەد سینوار بەرپرسی حەماس بوو لە غەززە و دەکاتە برا بچووکی یەحیا سینوار کە ئەویشیان لە بۆردوومانێکی ئیسرائیلدا کوژرا.