پێشەوا هەورامانی: گەڕانەوەی سەرۆكوەزیران لە ئەمریكا پڕۆسەی پێكهێنانی حكومەت خێراتر دەكات

ئاڤا نیوز

پێشەوا هەورامانی، گوتەبێژی حكومەتی هەرێمی كوردستان بەشێك لە ناوەڕۆكی كۆبوونەوەی ئەمڕۆی ئەنجوومەنی وەزیران ئاشكرا دەكات و دەڵێت یەكێك لە بابەتەكان باسكردن بوو لە پێكهێنانی حكومەت و لەمبارەیەوە سەرۆكوەزیران مەسرور بارزانی، پەیامێكی خستەڕوو.

وێنە گەورەکە: هەوڵەکان بۆ پێکهێنانی کابینەی نوێی حکومەتی هەرێمی کوردستان بەردەوامە، تا ئێستا چەندین کۆبوونەوە لە سەر ئاستی باڵا لە نێوان پارتی و یەکێتی کراوە بۆ ئەو مەبەستە. 

لێدوانی فەرمی: پێشەوا هەورامانی، گوتەبێژی حكومەتی هەرێمی كوردستان بە ئاڤا میدیای ڕاگەیاند: ئەمڕۆ لە كۆبوونەوەی ئەنجوومەنی وەزیران، گفتوگۆ سەبارەت بە پرسی پێكهێنانی حكومەت هەبوو، سەرۆكوەزیران مەسرور بارزانی باسی پێكهێنانی كابینەی دەی حكومەتی كرد، هیوای خواست كە بەزووترین كات،  بگەینە ئەنجامێك، پێویستە نزیكبوونەوەیەك هەبێت، ئێستا مادام ئەو دوو حیزبە (پارتی و یەكێتی) بڕیاریان داوە،پێكەوە حكومەت پێكبهێنن دەبێت جددی بن و لەسەر خاڵی بچووك و پۆستی وەزیرێك، پێكهێنانی كابینەكە زیاتر دوانەخرێت.

زانیاریی زیاتر: سەبارەت بە داواكاریی یەكێتی بۆ پۆستە سیادی و باڵاكان و چەند وەزارەتێكی گرنگ، پێشەوا هەورامانی گوتی: هەفتەی داهاتوو گفتوگۆكان دەچنە قۆناغێكی دیكەوە و گفتوگۆكان بۆ پێكهێنانی حكومەت چڕتر دەبنەوە، سەرۆكوەزیران  زیاتر جەخت لەسەر ئەوە دەكاتەوە كە كابینەی دەی حكومەت زوو پێكبهێندرێت و پۆستێك و پلەیەك و داواكارییەكی حیزبی نەبێتە هۆی دواخستنی، پێویستە هەر لایەنێك واقیعیانە سەیری پڕۆسەكە بكات نەك لە قەبارەی خۆی زیاتر.

"بەرزكردنەوەی ئاستی داواكارییەكان، ڕەنگە لێكدانەوەی ئەوەی بۆ بكرێت كە نیازێكی دیكە هەبێت لە پێكهێنانی حكومەت و نیازی ڕێككەوتن نەبێت".

"سەرۆكوەزیران مەسرور بارزانی، كۆتایی بە سەردانەكەی بۆ ئەمریكا هێنا و ئەمڕۆ لە كۆبوونەوەی ئەنجوومەنی وەزیران بەشدار بوو و گەڕانەوەی ئەو كاریگەریی دەبێت لەسەر ئەوەی كە پرۆسەی پێكهێنانی حكومەت خێراتر بێت و گفتوگۆكان چڕتر ببنەوە".