بەهۆی گەرما تاقیكردنەوەکانی پۆلی 12 لە كاتژمێر 7:30 دەستپێدەكات

ئاڤا نیوز

بەهۆی بەرزبوونەوەی پلەكانی گەرما، ئەمساڵ بۆ یەكەمجار تاقیكردنەوە گشتییەكانی پۆلی 12ـی ئامادەیی لە كاتژمێر 7:30ـی خولەكی بەیانی دەستپێدەكەن.

چیرۆكی سەرەكی: تاقیكردنەوە گشتییەكانی پۆلی 12ـی ئامادەیی بە بەشداری ، 115,787 قوتابی لەسەرجەم بەشەكانی وێژەیی، زانستی و پیشەیی، لە ڕێككەوتی 2025-06-01، دەستپێدەكات و تاوەكو 2025-06-29، بەردەوام دەبێت، هەفتانە دوو تاقیكردنەوە ئەنجام دەدرێن، لەگەڵ ئەوەشدا جەژنی قوربان دەكەوێتە نێو تاقیكردنەوەكانەوە، بۆیە پێش جەژن تەنها دوو تاقیكردنەوە ئەنجام دەدرێن و شەش تاقیكردنەوەكەی تر دەكەونە پاش پشووی جەژن.

لێدوانی فەرمی: سامان سیوەیلی، وتەبێژی وەزارەتی پەروەردەی حكومەتی هەرێمی كوردستان، بۆ ئاڤا ئاشكرایكرد، ئەوەی تاقیكردنەوە گشتییەكانی ئەمساڵ لە ساڵانی ڕابردوو جیا دەكاتەوە، ئەوەیە كە بۆ یەكەمجار و لەبەر گۆڕانی كەشوهەوا و بەرزبوونەوەی پلەكانی گەرما، تاقیكردنەوەكان بەیانیان كاتژمێر 7:30 دەست پێدەكەن.

لەلایەکی دیکەوە: وتەبێژی وەزارەتی پەروەردە وتی، ڕۆژی دووشەممە تاقیكردنەوەی كۆتایی پۆلە ناكۆتاكان و پۆلی نۆیەم لە هەرێمی كوردستان، سەركەوتووانە كۆتاییان هات كە تێیدا نزیكەی ملیۆنێك و حەوسەد هەزار قوتابی بەشداربوون. ئەنجامەكانیش دوای پشكنینی پەڕاوی وەڵامەكانیان و دانانی نمرەكانیان، لە چەند ڕۆژی ئایندە ڕادەگەیێنرێت. بڕیاریش وایە، خولی دووەمی پۆلە ناكۆتاكان و پۆلی نۆیەمی گشتی، ڕێكەوتی 16/6 دەست پێ بكەن.

زانیاریی زیاتر: تاقیكردنەوەی بەشی زانستیی پۆلی 12ـی ئامادەیی بە وانەی (زیندەزانی) دەستپێدەكات، بەشی وێژەیی بە وانەی (مێژوو) دەستپێدەكات، سەرووی دوو هەزار هۆڵ ئامادەكراون بۆ بەڕێوەچوونی تاقیكردنەوەكان.