بە سەرپەرشتیی مەسرور بارزانی هەڵمەتێكی نیشتمانیی بەرەنگاربوونەوەی ماددە هۆشبەرەكان دەستپێدەكات

ئاڤا نیوز

 

بەمەبەستی ڕووبەڕووبوونەوە و ڕێگری لە بڵاوبوونەوەی زیاتری ماددە هۆشبەرەكان، بەسەرپەرشتیی سەرۆكوەزیران مەسرور بارزانی، ئەمرۆ لە شاری هەولێر، دەزگای خێرخوازی بارزانی هەڵمەتی نیشتمانیی بەرەنگاربوونەوەی ماددە هۆشبەرەكان دەستپێدەكات.

وێنە گەورەكە: هەڵمەتەكە هۆشیارییە لەژێر درووشمی "بەیەکەوە بەرەو کۆمەڵگەیەکی بەهێز و ساغڵەم" ئەمڕۆ دەستپێدەكات و ماوەی ساڵێك بەردەوام دەبێت. دەزگای خێرخوازی بارزانی مەبەستیەتی هەمووان لە مەترسیی ماددە هۆشبەرەكان ئاگادار بكاتەوە.

لێدوانی فەرمی: موسا ئەحمەد، سەرۆكی دەزگای خێرخوازیی بارزانی بە ئاڤا میدیای ڕاگەیاند: دەبوو لە كاتێكی زووتر دەستمان بە هەڵمەتی لەمشێوەیە بكردبا، هەرچەندە حكومەت و خودی سەرۆکوەزیران كاری زۆر كردووە و جەختی لەسەر بەرەنگاربوونەوەی ماددە هۆشبەرەكان كردووەتەوە.

 

موسا ئەحمەد، دەڵێت، دەزگای خێرخوازیی بارزانی، لە ساڵانی ڕابردوو لە هەموو ئەو بابەتە هەستیارانەی كە پەیوەندیدارن بە كۆمەڵگەوە و تاكی كوردییەوە ڕۆڵی دیاری هەبووە،  بەپێویستمانزانی بە سەرپەرشتیی ڕاستەوخۆی سەرۆكوەزیران مەسرور بارزانی هەڵمەتێكی نیشتمانی بۆ بەرەنگاربوونەوەی ماددەی هۆشبەرەكان دەستپێبكەین.

 

لەبارەی ماوەی هەڵمەتەکە، سەرۆکی دەزگای خێرخوازیی بارزانی دەڵێت، هەڵمەتەكە بۆ ساڵێكە، بەڵام بێگومان كە لەسەر خواستی لایەنی پەیوەندیدار و كاریگەربوونی پرۆسەكە ئێمە ئامادەین زیاتر لەوەش بەردەوام بین.

 

ئاماژەی بۆ ئەوەشکرد، "هەوڵ دەدەین لە ڕێگەی شوێنە ئایینییەكان و ناوەندەكانی خوێندن و میدیاكانەوە بگەینە نێو هەموو ماڵێك و هەموو تاكێك لە مەترسیی ماددە هۆشبەرەكان ئاگادار بكەینەوە، ئامادەكاریی زۆر باشمان بۆ پڕۆژەكە كردووە.