هاکان فیدان دوای کۆبوونەوە لەگەڵ پووتین سەردانی کیێڤ دەکات

ئاڤا نیوز

 

وەزیری دەرەوەی تورکیا دوای سەردانە دوو ڕۆژییەکەی بۆ ڕووسیا، بە سەردانێکی فەرمی گەشتە کیێڤی پایتەختی ئۆکراینا.

 

وێنە گەورەکە: تورکیا لە ئێستادا بووە بە وێستگەی کۆبوونەوە ڕاستەوخۆ و ناڕاستەوخۆکانی نێوان ڕووسیا و ئۆکراینا، گفتوگۆ و دانوستاندنی نێوان مۆسکۆ و کیێڤ بەسەرپەرشتی واشنتن و ئەنقەرە بەڕێوەدەچێت، هاکان فیدان، وەزیری دەرەوەی تورکیا دوای کۆبوونەوەی لەگەڵ ڤلادیمێر پووتین، سەرۆکی ڕووسیا، بەسەردانێکی فەرمی گەشتە کیێڤی پایتەختی ئۆکراینا.

 

بڵاوکراوەی فەرمی: بەپێی ماڵپەڕی وەزارەتی دەرەوەی تورکیا، هاکان فیدان لەگەڵ ئەندرێی سیبیها، وەیری دەرەوەی ئۆکراینا کۆبووەتەوە و بڕیاروایە لەگەڵ هەریەک لە ڤۆلۆدیمێر زێلینسکی، سەرۆکی ئۆکراینا، دێنیس شمیهال، سەرۆکوەزیرانی ئۆکراینا، ڕۆستەم ئومەرۆڤ، وەزیری بەرگریی ئۆکراینا و ئەندرێی یەرماک، بەرپرسی نوسینگەی سەرۆکایەتیی ئۆکراینا کۆبوونەوە بکات.

 

زانیاریی زیاتر: پرسە سەرەکیەکانی کۆبوونەوەکان بریتی دەبن لە: دانوستاندنەکانی نێوان ڕووسیا و ئۆکراینا بۆ ڕاگەیاندنی ئاگربەست و ڕێککەوتنامەی ئاشتی، نێوەندگیریی تورکیا و میوانداریکردنی دانوستاندنەکان، دۆزینەوەی ڕێگەچارەی دیپلۆماسی لەبری بەردەوامیدان بە جەنگ، پرسەکانی بەرگری و ئاسایش و یەکپارچەیی و سەربەخۆیی خاکی تورکیا و ئۆکراینا و دووبارە بونیادنانەوەی ئۆکراینا لە کۆبوونەوەکان تاوتووێ دەکرێن.