هەفتەی داهاتوو بۆ ڕووسیا و ئۆکراینا چارەنووسساز دەبێت

ئاڤا نیوز

بڕیار وایە گەڕێکی دیکەی دانوستان لەنێوان هەردوو شاندی ڕووسی و ئۆکراینی لە هەفتەی داهاتوو دەستپێبکات، بەڵام کۆشكی کرێملن دەڵێت، هێشتان وەڵاممان لە ئۆکراینا وەرنەگرتووە.

وێنە گەورەکە: گەڕی یەکەمی دانوستانەکانی ڕووسیا و ئۆکراینا لە 16ـی مانگی ئایار لە ئیستەنبووڵ ئەنجامدرا و هەردوولا ڕێککەوتن لەسەر ئاڵوگۆڕکردنی ڕەشنووسی مەرجەکانیان بۆ کۆتاییهێنان بە شەڕی سێ ساڵەی نێوانیان، بۆ هەمان مەبەست بڕیارە خولێکی دیکەی دانوستانەکانی ئاشتی لە 2ـی حوزەیران دەستپێبکات.

لێدوانی فەرمی: دیمیتری پێسکۆڤ، وتەبێژی کرێملن ڕایگەیاند، تا ئێستا هیچ وەڵامێک نییە، پێویستە چاوەڕێی وەڵامی لایەنی ئۆکراینا بین.

لەلایەکی دیکەوە: سێرگی لاڤرۆڤ، وەزیری دەرەوەی ڕووسیا ڕایگەیاند، شاندی ڕووسیا ئامادەیە کە ڕەشنووسی یاداشتی ئاشتی کە مەرجەکانی ڕووسیای  تێدایە لە گەڕی دووەمی دانووستانەکان لە ڕۆژی دووشەممەی داهاتوو بخاتەڕوو.

ئەوەی لەبارەیەوە دەگوترێت: بەهۆکاری ئەوەی کە دانوستانەکان لە تورکیا بەڕێوەدەچێت، سەرۆککۆماری وڵاتەکە پەیامێکی ئاراستەی هەردوو لایەنی ڕووسی و ئۆکراینی کرد کەتێیدا داوا دەکات، دەرگای گفتۆگۆی ئاشتی بەڕووی یەکتردا دانەخەن.