مەسرور بارزانی و خەمیس خەنجەر جەخت لە ناردنی شایستە داراییەکانی خەڵکی کوردستان دەکەنەوە

ئاڤا نیوز

 

سەرۆکوەزیران مەسرور بارزانی و خەمیس خەنجەر، سەرۆکی هاوپەیمانیی سیادەی عێراق جەخت لە ناردنی شایستە داراییەکانی خەڵکی کوردستان دەکەنەوە.

 

چیرۆکی سەرەکی: ئەمڕۆ پێنجشەممە 29ـی 5ـی 2025، سەرۆکوەزیران مەسرور بارزانی پێشوازی لە خەمیس خەنجەر، سەرۆکی هاوپەیمانیی سیادە لە ئەنجوومەنی نوێنەرانی عێراق کرد؛ شایستە داراییەکانی خەڵکی کوردستان، سیستمی فیدراڵی و هەڵبژاردنی داهاتووی ئەنجوومەنی نوێنەرانی عێراق گفتوگۆیان لەبارەوە کرا. 

ڕاگەیێنراوی فەرمی: حکومەتی هەرێمی کوردستان لە ڕاگەیێنراوێکدا بڵاویکردەوە، لە کۆبوونەوەکەی سەرۆکوەزیران مەسرور بارزانی و خەمیس خەنجەر، "گفتوگۆ لەبارەی دۆخی گشتیی عێراق و ئامادەکارییەکانی هەڵبژاردنی ئەنجوومەنی نوێنەرانی عێراق کرا کە بڕیارە لە مانگی نۆڤێمبەری ئەمساڵ بکرێت.

 

ئەوەی پێویستە بیزانیت: لە بەشێکی دیکەی دیدارەکەدا، جەخت لە گرنگیی ڕێزگرتن لە سیستمی فیدراڵیی و مافەکانی گشت پێکهاتەکانی عێراق و قەوارەی دەستووری هەرێمی کوردستان و ناردنی شایستە داراییەکانی خەڵکی کوردستان کرایەوە.