پزیشکیان: ئامانجی ئێران لە بەرنامە ئەتۆمییەکەی دەستکەوتنی چەکی ئەتۆمی نییە

ئاڤا نیوز

 

سەرۆککۆماری ئێران جارێکی دیکە پەیام ئاڕاستەی وڵاتانی ڕۆژئاوا و ئەمریکا دەکات و ڕایدەگەیەنێت، بەرنامە ئەتۆمییەکانی وڵاتەکەمان تەنها بۆ خزمەتی بواری پیشەسازیی وڵاتەکەمانە. 

 

وێنە گەورەکە: دانوستانەکانی نێوان واشنتن و تاران تاوەکو ئێستا بەردوامیان هەیە، لە کۆتا کۆبوونەوەشدا ئەمریکا داواکاری ئەوەی لە تاران هەبووە کە نابێت ئەو وڵاتە بە هیچ شێوەیەک دەستی بگات بە پیتاندنی یۆرانیۆم، ئێران ئەم داوایەی واشنتن بە هۆکاری شکست بۆ دانوستاندن و کۆبوونەوەکان ناوزەند دەکات.

 

لێدوانی فەرمی: مەسعود پزیشکیان، سەرۆککۆماری ئێران ئەمڕۆ  پێنجشەممە ڕایگەیاند: ئێستا ئێران لە قۆناغێکی گرنگی پێشکەوتندایە و پەیوەندییە نێودەوڵەتییەکانمان بەرەو پێش دەچێت، ئێران ئەوەی بۆ هەموو جیهان پیشانداوە کە ئامانجی لە بەرنامە ئەتۆمییەکەی بۆ پێشکەوتنی بواری زانست و وزە و ئابووری و پێشکەوتنی بواری پزیشکییە بۆ خزمەتکردنی خەڵکی ئێرانە.

 

لە لایەکی دیکەوە: مەسعود پزیشکیان، سەرۆککۆماری ئێران لە چاوپێکەوتنێکی تەلەفزیۆنیدا لەگەڵ کەناڵی فەرمی عوممان ئاماژەی بە یاسای نێودەوڵەتیی کرد کە ڕێگە بە هەموو دەوڵەتێک دەدات کە لە پێناو پێشکەوتنی زانست و توێژینەوەکانی پەیوەست بە بواری پزیشکی بەرنامەی ئاشتیخوازانەی پیاندنی یۆرانیۆمیان هەبێت، ئێمەش بۆ خزمەتکردنی خەڵک و وڵات ئەمە بە مافی خۆمان دەزانین، ئامانجی ئێمە دەستکەوتنی چەکی ئەتۆم نییە.

 

ئەوەی پێویستە بیزانیت: ڕۆژی هەینی ڕابردوو، وەفدی ئێران و ئەمریکا بە سەرۆکایەتیی عەباس عێراقچی، وەزیری دەرەوەی ئێران و ستیڤ ویتکۆڤ، نێردراوی تایبەتی سەرۆکی ئەمریکا بۆ جاری پێنجەم بۆ گفتووگۆکردن لەسەر بەرنامە ئەتۆمییەکەی ئێران لە شاری ڕۆما کۆبوونەوە.