پارتی چاکسازیی تورکمان: داواکارین کۆی لایەنە کوردستانییەکان لە بەغدا یەکریز و هاوئاهەنگ بن

ئاڤا نیوز

پارتی چاکسازیی تورکمان ڕایدەگەیێنێت، بەغدا مووچەی کردووەتە کارتێکی سیاسی بۆ لاوازکردن و دژایەتیکردنی حکومەتی هەرێمی کوردستان و خەڵکەکەی. وەک پارتی چاکسازی تورکمان داواکارین کە کۆی لایەنە سیاسییەکان یەکڕیز و هاوئاهەنگ بن لە بەغدا.

چیرۆکی سەرەکی: ڕۆژی چوارشەممە ڕێککەوتی 28ـی 5ـی 2025، تەیف سامى، لەڕێگەی نووسراوێکەوە حکومەتی هەرێمی کوردستانی ئاگادارکردووەتەوە کە چیدیکە بەغدا ناتوانێت مووچەی فەرمانبەرانی کوردستان بنێرێت، ئەمەش بە پاساوی ئەوەی هەرێمی کوردستان بڕی پشکی خۆی لە یاسای بودجە تێپەڕاندووە.

وێنە گەورەکە: تا دێت کاردانەوەکان لە دژی بەغدا فراونتر دەبن و هەڵوێست لە دژی نووسراوەکەی تەیف سامی وەردەگیرێت کە ئاراستەی ئەنجوومەنی وەزیرانی عێراقی کردبوو و تێیدا هاتبوو کە چیدیکە ناتوانن مووچە و شایستە داراییەکانی هەرێمی کوردستان بنێرن. پارتی چاکسازیی تورکمان لە ڕاگەیێنراوێکدا داوا لە هێز و لایەنە سیاسییەکانی هەرێمی کوردستان دەکات هەڵوێست لە دژی بەغدا وەربگرن.

ڕاگەیێنراوی فەرمی: پارتی چاکسازیی تورکمان لە ڕاگەیێنراوێکدا ڕایگەیاند، بەداخەوە حکومەتی فیدراڵی عێراق بەردەوامە لە سزادانی هاووڵاتیانی هەرێمی کوردستان و ماددەکانی دەستوور پێشێڵ دەکات  و پاشگەز دەبێتەوە لە ڕێککەوتنەکان بە بیانوی بێ پاسا و بێ بنەما کە لەسەر مووچە و شایستە داراییەکان ئەنجام درابوون. دەشڵێت، بەغدا مووچەی کردووەتە کارتێکی سیاسی بۆ لاوازکردن و دژایەتیکردنی حکومەتی هەرێمی کوردستان و خەڵکەکەی.

هەر لە ڕاگەیێنراوەکەدا هاتووە، پارتی چاکسازیی تورکمان بەپێویستی دەزانێت کە هەڵوێستی جددی بەرامبەر بۆ ئەو پێشێڵکارییانەی حکومەتی فیدراڵی وەربگیرێت، داواکاریشن کە کۆی لایەنە سیاسییەکان یەکڕیز و هاوئاهەنگ بن لە بەغدا و هەرێمی کوردستان واز لە کێشەکانی ناوخۆ بهێنن، "چونکە تاکە ڕێگەی بەهێزیمان و سەرکەوتنمان یەکریزییە، هەر لەو ڕێگەشەوە دەتوانین سەرجەم مافەکانمان بەدەست بهێنین".

 

لەلایەکی دیکەوە: هەر ئەمڕۆ پارتی دیموکراتی کوردستان ڕایدەگەیاندبوو، ئەگەر بەغدا تا پێش جەژنی قوربان شایستە داراییەکانی خەڵکی هەرێمی کوردستان ڕەوانە نەکات، هەڵوێستی جدییان دەبێت.