یەکەم پەیام لە ئەمریکاوە لەبارەی ڕاگرتنی مووچەی خەڵکی کوردستان لەڕێگەی ئاڤاوە

ئاڤا نیوز

 

دوای ڕاگرتنی قووتی فەرمانبەرانی هەرێمی کوردستان لەلایەن بەغداوە، بەرپرسێکی وەزارەتی دەرەوەی ئەمریکا پەیامێک لە ڕێگەی ئاڤا میدیاوە بۆ عێراق دەنێرێت و دەڵێت: پاڵپشتییەکانی ئەمریکا بۆ هەرێمی کوردستان، تووخمێکی زۆر گرنگە لە پەیوەندییەکانمان لەگەڵ عێراق. 

 

وێنە گەورەکە: دوا بەدوای بڕیاری ڕاگرتنی پشکی مووچەی مووچەخۆرانی هەرێمی کوردستان لەلایەن وەزیری دارایی عێراقەوە، کاردانەوەی سیاسی ناوخۆی و عێراقی و جیهانیشی لێکەوتەوە، فراکسیۆنە کوردستانییەکانیش لە بەغدا بە یەکدەنگ ئەو هەڵوێستەیان سەرکۆنە کرد و داوای هەڵوێست وەرگرتنیان لە سەرجەم وەزیر و کاربەدەستانی کوردیش کرد لە کابینەی محەممەد شیاع سوودانی، کە هەڵوێستی جددی بنوێن بەرامبەر ئەو بڕیارانەی بەغدا.

ڕاگەیێنراوی فەرمی: بەرپرسێکی وەزارەتی دەرەوەی ئەمریکا لە ڕێگەی ئاڤاوە پەیامێک بۆ عێراق دەنێرێت و باس لەوە دەکات، هانی بەغدا و هەولێر دەدەین ماف و شایستە دەستوورییەکانی یەکتر بدەن و بە گفتوگۆ کێشەکانی نێوانیان چارەسەر بکەن.

لە بەشێکی دیکەی پەیامەکەدا هاتووە،  ڕادەستکردنی خێرای شایستە داراییەکان ئاماژەیەکە بۆ ئەوەی عێراق مەبەستییەتی بەرژەوەندییەکانی گەلەکەی بکاتە پێشینەی کارەکانی.

ئەم هەنگاوە ژینگەیەک بۆ کۆمپانیاکان دروست دەکات کە خوازیار بن وەبەرهێنانی تێدا بکەن، هاوکات ئاماژەیەکی ئەرێنییە بۆ دووبارە دەستپێکردنەوەی هەناردەی نەوت لە ڕێگەی تورکیاوە.

پاڵپشتییەکانی ئەمریکا بۆ هەرێمی کوردستان، وەک تووخمێکی زۆر گرنگ لە پەیوەندییەکانمان لەگەڵ عێراق دەمێنێتەوە.

زانیاریی زیاتر: بەم دواییانە مارکۆ ڕوبیۆ وەزیری دەرەوەی ئەمریکا میوانداریی لە سەرۆکوەزیرانی هەرێمی کوردستان، مەسرور بارزانی کرد و لەگەڵ نێچیرڤان بارزانی سەرۆکی هەرێمی کوردستان بە تەلەفۆن قسەی کرد، تیشکی خستە سەر گرنگیی هاوکاریی بەردەوامی ئەمریکا و هەرێمی کوردستان بۆ پتەوکردنی سەقامگیری و خۆشگوزەرانی لە عێراق و ناوچەکەدا.

باکگراوند: ڕۆژی چوارشەممە ڕێککەوتی 28ـی 5ـی 2025، تەیف سامى، وەزیری دارایی عێراق، لەڕێگەی نووسراوێکەوە حکومەتی هەرێمی کوردستانی ئاگادارکردووەتەوە کە چیدیکە بەغدا ناتوانێت مووچەی فەرمانبەرانی کوردستان بنێرێت، ئەمەش بە پاساوی ئەوەی هەرێمی کوردستان بڕی پشکی خۆی لە یاسای بودجە تێپەڕاندووە.