هاکان فیدان: ڕووسیا و ئۆكراینا بە ئاگربەست ڕازین

ئاڤا نیوز

 

هاکان فیدان، وەزیری دەرەوەی تورکیا ڕایگەیاند، دەستپێکردنی دانوستانەکان لە ئیستەنبووڵ خاڵی گۆڕانکاریی بەهێزە و هەردوولایەنی ڕووسیا و ئۆکراینا خواستی ڕاگەیاندنی ئاگربەستیان هەیە. 

 

چیرۆکی سەرەکی: فیدان کە سەرپەرشتی یەکەم دانوستانی نێوان ئۆكراینا و ڕووسیای کرد لە ئیستەنبووڵ، جەخت لەوە دەکاتەوە کە بەردەوامن لە هەوڵەکانیان بۆ بەردەوامیدان بە دانوستانەکان بۆ گەیشتن بە چارەسەرێکی کۆتایی. 

 

لێدوانی فەرمی: هاکان فیدان، وەزیری دەرەوەی تورکیا دەڵێت: گەیشتن بە ئاگربەست لە نێوان ئۆكڕاینا و ڕووسیا ئاسان نییە، لەبەر ئەوەی هەریەکەیان داواکاری جیاوازیان هەیە و پێویستیان بە سازانە، بەڵام بە نێوەندگیری ئێمە لە یەکتری نزیک دەبنەوە. 

 

ئەوەی پێویستە بیزانیت: مۆسکۆ پێشنیازی کردووە گەڕی دووەمی دانوستانەکان لە 2-6 لە ئیستەنبووڵ بکرێت، هاوکات باسی لەوەشکرد کە ڕەشنووسی ئاشتی ئامادە دەکەن، بەڵام هێشتا ئۆکراینا وەڵامی ئەو پێشنیازەی ڕووسیای نەداوەتەوە.

 

باکگراوند: لە 16-5 شاندی دانوستانکاری نێوان ئۆکراینا و ڕووسیا لە ئیستەنبووڵ بە نێوەندگیری تورکیا و ئەمریکا کۆبوونەوە، دوای دانوستانەکە 1000 دیلییان ئاڵوگۆرکرد.