دادگای تێهەڵچوونەوەی هەڵەبجە دەكرێتەوە

ئاڤا نیوز

 

دوای بەفەرمی بوونی بە چوارەم پارێزگای هەرێمی كوردستان و نۆزدەهەمین پارێزگای عێراق، هەوڵەكان بۆ كردنەوەی سەرۆكایەتیی دادگای تێهەڵچوونەوە (إستئناف)ـی ناوچەی هەڵەبجە چڕتر بوونەتەوە.

 

ئەوەی پێویستە بیزانیت: بەگوێرەی هەیكەلیەتی ئەنجوومەنی باڵای دادوەری لە هەرێمی كوردستان و عێراق، هەر پارێزگایەك پێویستە سەرۆكایەتی دادگای تێهەڵچوونەوەی تایبەت بەخۆی هەبێت، ئێستا سێ دادگای تێهەڵچوونەوە لە هەرسێ پارێزگاكەی دیكەی هەرێمی كوردستان هەن.

 

هۆكارە زانراوەكان: بەو پێیەی پێشتر هەڵەبجە بەفەرمی نەببووە پارێزگا، تا ئێستا دادگای تێهەڵچوونەوەی نییە و سەرجەم دۆسیەكانی داوا بۆ پێداچوونەوە و تانەگرتن لێی، بۆ دادگای تێهەڵچوونەوەی ناوچەی سلێمانی دەگەڕێندرایەوە، ئەمەش جگە لەوەی بارگرانی زۆری لەسەر ڕەوتی دادوەریی پارێزگای سلێمانی دروستكردووە، هاوكات دەبێتە هۆی درەنگكەوتنی یەكلاییبوونەوەی دۆسیەكانی دادگا و پەككەوتنی ڕێكارە دادوەرییەكان.

 

چی ڕوودەدات: لە درێژەی هەوڵە بەردەوامەكان بۆ كردنەوەی دادگای تێهەڵچوونەوەی ناوچەی هەڵەبجە، لەدیوانی پارێزگای هەڵەبجە بە ئامادەبوونی هەریەك لە نوخشە ناسیح، پارێزگاری هەڵەبجە، قایمقامی قەزای ناوەندی، سەرۆكی دادگای تێهەڵچوونەوەی ناوچەی سلێمانی، سەرۆكی دادگای بەرایی هەڵەبجە، سەرۆكی فەرمانگەی داواكاری گشتیی هەڵەبجە، كۆبوونەوەیەكی فراوان كرا و گفتوگۆی تێروتەسەل دەربارەی ڕێكارە ئیدارییە پێویستەكان كرا بۆ خێراكردنی هەنگاوەكانی كردنەوەی دادگای تێهەڵچوونەوەی ناوچەی هەڵەبجە.

 

ڕاگەیێنراوی فەرمی: بەگوێرەی ڕاگەیێنراوی دیوانی پارێزگای هەڵەبجە، شاندی باڵای پارێزگا و دەسەڵاتە دادوەرییەكان، چەند شوێنێكی پێشنیاركراویان لەنزیكەوە بەسەركردەوە كە بڕیارە ببێتە باڵەخانەی دادگای تێهەڵچوونەوەی هەڵەبجە.