سوپای عێراق شەش چەکداری داعش بە فڕۆکەی F16 دەکاتە ئامانج

ئاڤا نیوز

ئەمڕۆ هەینی، فەرماندەیی ئۆپەراسیۆنە هاوبەشەکانی عێراق، شەش ئەندامی داعشی بە فڕۆکەی F16 کردووەتە ئامانج لە دۆڵی "شای" لە پارێزگای سەڵاحەددین.

وێنە گەورەکە: هەرچەندە  لە ساڵی 2017ـەوە ڕێکخراوی داعش لە عێراق شکستی هێناوە، بەڵام تاوەکو ئێستا شانە نوستووەکانی ڕێکخراوەکە جار جار هێزە ئەمنییەکان و هاووڵاتییانی مەدەنی بەئامانج دەگرن، بۆیە پێشمەرگە و سوپای عێراق بە پشتیوانیی هاوپەیمانی نێودەوڵەتیی بەردەام ئۆپەراسیۆن دژی چەکدارانی ئەو ڕێکخراوە ئەنجامدەدەن.

ڕاگەیێنراوی فەرمی: فەرماندەیی ئۆپەراسیۆنە هاوبەشەکانی عێراق لە ڕاگەیێنراوێکدا ڕایگەیاند: بە درێژایی دوو مانگ لە چاودێریکردنی تیرۆریستان لە دۆڵی شای لە لایەن هەواڵگیرییەوە و دوای بەدواداچوون و چاودێریرکردنی فەرماندەیی ئۆپەراسیۆنە هاوبەشەکان لە دوێنێ شەوەوە تاوەکو بەرەبەیانی ئەمڕۆ هەینی، بە فڕۆکەی F16 و "سیزنا کاراڤان" شوێنی شەش چەکداری تیرۆریست بۆردوومانکرا و شوێنەکە بە تەواوی خاپوور کرا.

ئەوەی پێویستە بیزانیت: دوای ڕووخانی دەسەڵاتی بەشار ئەسەد لە کۆتایی ساڵی ڕابردووەوە، داعش ژمارەیەکی زۆر چەک و کەرەستەی سەربازی لە سووپای پێشووی سووریا دەستکەوتووە و ئەوەش توانای ڕێکخراوەکەی بۆ ئەنجامدانی هێرشی سەربازیی زیاتر کردووە، حکومەتی عێراق بە هەماهەنگی لەگەڵ هێزەکانی پێشمەرگە ڕێکاری تووندیان بە درێژایی سنووری عێراق- سووریا گرتووەتەبەر.