شوان کەلاری: ناتەبایی کورد وایکردووە بەغدا لە سزادانی خەڵکی کوردستان بێباک بێت

ئاڤا نیوز

ئەندامێکی ئەنجوومەنی نوێنەرانی عێراق ڕایدەگەیەنێت، هۆکاری سەرەکی بێ باکی حکومەتی عێراق لە نەناردنی مووچەی هەرێمی کوردستان ئەوەیە: کەسانێکی بەکرێگیراو وەهایان لە دەسەڵاتدارانی بەغدا گەیاندووە کە ئەگەر مووچەی کوردستان نەنێردرێت و سزای خەڵک بدرێت، خەڵکی کوردستان هیچ گلەییەک لە بەغدا ناکەن و هەموو کەموکوڕییەکە دەخەنە ئەستۆی حکومەتی هەرێمی کوردستان و بەتایبەتیش پارتی.

 

وێنە گەورەكە: ڕۆژی چوارشەممە، 28-5-2025، وەزارەتی دارایی عێراق بە واژۆی تەیف سامی، نووسراوێكی دەركرد بە ڕاگرتنی ناردنی مووچەی مووچەخۆرانی هەرێمی كوردستان لە مانگی پێنجەوە تا کۆتایی ساڵ کە هەشت مووچە دەکات، ئەو بڕیارەش كاردانەوەی ناوخۆی و عێراقی زۆری بەدوای خۆیدا هێنا.

 

لێدوانی فەرمی: شوان کەلاری، ئەندامی ئەنجوومەنی نوێنەرانی عێراق بە ئاڤای ڕاگەیاند، "کۆمەڵێک هۆکار هەن کە وایکردووە بەغدا بە بەردەوام غەدر لە هاووڵاتیانی هەرێمی کوردستان بکات.

- لە ڕابردوودا ژمارەیەک کەسایەتی سیاسی و پەرلەمانتار و هەندێک حیزبی کوردیش، کە زۆربەیان مووچە و ئیمتیازیان لە بەغدا و وڵاتانی ئیقلیمی هەیە، بەمجۆرەیان لە دەسەڵاتدارانی بەغدا گەیاندووە، کە ئەگەر مووچە ڕەوانە نەکەن و خەڵکی کوردستان برسی بکەن، ئەوا خەڵکی کوردستان لۆمەی دەسەڵاتدارانی بەغدا ناکەن، بەڵکو هەڵەکەی دەخەنە ئەستۆی حکومەتی هەرێمی کوردستان و پارتی دیموکراتی کوردستانیش بەتایبەت، ئەمەش بە لێکدانەوەی خۆیان فاکتەرێکی گونجاوە بۆ لاوازکردنی پێگەی پارتی و حکومەتی هەرێم."

- ئەو پەرلەمانتارە هۆکارێکی دیکەش بۆ نەناردنی شایستەی هەرێمی کوردستان باس دەکات و دەڵێت، "ئەوانەی ئێستا حوکمی عێراق دەکەن، بەشێک لە سەرکردە سیاسییەکانی هەرێمی کوردستان زۆرباش دەناسن و کۆمەڵێک بەرژەوەندی هاوبەش کۆیاندەکاتەوە، بۆیە دڵنیان لەوەی سەرکردایەتیی سیاسیی کورد لە بابەتە چارەنووسسازەکان یەکدەنگ نین، ئەوەش وایکردووە بەغدا هیچ ترسێکی لە سزادانی بەکۆمەڵی خەڵکی کوردستان نەبێت."