مەزڵوم عەبدی: ئامادەم لەگەڵ ئەردۆغان کۆببمەوە

ئاڤا نیوز

فەرماندەی گشتیی هێزەکانی سووریای دیموکرات ڕایدەگەیێنێت، بڕیاری خۆهەڵوەشاندنەوە و دانانی چەک لەلایەن پەکەکەوە کاریگەریی ئەرێنی لەسەر ناوچەکەمان هەبووە، ئەو ئاگربەستەی ئێستاش هەیە، یەکێکە لە بەرهەمەکانی ئەو بڕیارەی پەکەکە. دەشڵێت، کێشەم نییە ئەگەر لەگەڵ ڕەجەب تەیب ئەردۆغان کۆببمەوە.

 

چیرۆکی سەرەکی: مەزڵووم عەبدی، فەرماندەی گشتیی هێزەکانی سووریای دیموکرات هەسەدە، لە چاوپێکەوتنێکی تەلەڤزیۆنیدا لە کەناڵی شەمس، تیشکی خستە سەر چەند پرسێکی تایبەت بە نێوخۆی سووریا و پەیوەندیان لەگەڵ دیمەشق و تورکیا.

 

لێدوانی ڕۆژنامەوانی: پەیوەست بە پەیوەندییەکانیان لەگەڵ تورکیا، مەزڵووم عەبدی ڕایگەیاند، ئێستا ئاگربەستێکی کاتی و مەرجدارمان هەیە، کەناڵەکانی پەیوەندیی ڕاستەوخۆمان لەگەڵ تورکیا و لە ڕێگەی نێوەندگیرەوە هەیە و هیوادارین ئەم پەیوەندییە پەرەی پێبدرێت، کێشەم نییە لەگەڵ ئەردۆغان کۆببمەوە و ئامادەین پەیوەندییەکی باش لەگەڵ تورکیا دابمەزرێنین.

 

بە تەنیشت ئەو بابەتەوە: بە گوتەی مەزڵوم عەبدی، ئێمە پێشوازیمان لە بڕیاری هەڵوەشاندنەوەی پارتی کرێکاران کرد و کاریگەری ئەرێنی لەسەر ناوچەکەمان هەبوو، ئەو ئاگربەستەی هەیە یەکێکە لە بەرهەمەکانی ئەوە بڕیارەی پارتی کرێکاران.

 

لەلایەکی دیکەوە: فەرماندەی گشتیی هەسەدە سەبارەت بە شێوەی سیستمی حکومڕانی لە سووریا ڕایگەیاند، "ئێمە سوریایەکی لامەرکەزیمان دەوێت کە هەموو پێکهاتەکان بە تەواوی مافەکانیانەوە تێیدا بژین و کەس پەراوێز نەخرێت". 

 

سەبارەت بەو ڕێککەوتنەی کە لە 10 ی ئازاردا لەنێوان هێزەکانی سووریای دیموکرات و حکومەتی سووریا واژۆ کراوە، فەرماندەی گشتیی هێزەکانی سووریای دیموکرات ڕایگەیاند، ئەو چارەسەرەی ئێمە دەمانەوێت لە دەستووری داهاتووی سووریادا پەسەند بکرێت، ئەوا ئاسوودە دەبین و دڵەڕاوکێمان نامێنێت و بەشداری لە پرۆسەی سیاسی دەکەین.

 

- پابەندین بەوەی لەگەڵ دیمەشق لەسەری ڕێککەوتووین، ئێستا کار لەسەر جێبەجێکردنی ئەم ڕێککەوتنە لە ڕێگەی لیژنە پراکتیکییەکانەوە دەکەین کە بەم زووانە کۆدەبنەوە بۆ لێکۆڵینەوە لەو هەنگاوانەی کە پێویستە بگیرێتەبەر بۆ جێبەجێکردنی.

 

- پەیوەست بە یەکخستنی هێزەکان لە سووریا، عەبدی ڕایگەیاند، "پێویستە سوریا یەک سوپای هەبێت و دامەزراوە سەربازییەکانیش بە هێزەکانی سووریای دیموکراتیشەوە یەکبخرێن".

 

- داهاتووی چەکدارانی هێزەکانی سوریای دیموکرات کاری لەپێشینەی ئێمەیە و دەبێت ڕۆڵی سەرەکییان هەبێت لە داهاتووی سووریادا. 

 

- ئەگەر بتوانین ڕێککەوتنەکە لەگەڵ دیمەشق بە دروستی جێبەجێ بکەین، ئەوا دەتوانین ئەو بۆشاییە پڕبکەینەوە کە هەیە و دیمەشق پێویستی بە شارەزایی هێزەکانی سووریای دیموکرات هەیە.