وتەبێژی بزووتنەوەی گۆڕان: بەغدا لە ساڵی 2014وە سزای خەڵکی ئێمە دەدات

ئاڤا نیوز

 

وتەبێژی بزووتنەوەی گۆڕان لەدوای کۆبوونەوەی لایەنەکان لە پیرمام ڕایگەیاند: باشترکردنی ژیانی خەڵک لە موزایەدەی سیاسی لایەنەکان گرانترە.

 

چیرۆکی سەرەکی: ڕۆژی شەممە لایەنە سیاسییەکانی هەرێمی کوردستان بە دەستپێشخەرییەکی پارتی دیموکراتی کوردستان لە پیرمام کۆبوونەوە، ئامانج لەو کۆبوونەوەیەش یەکخستنی هەڵوێستی کورد بوو بەرامبەر بە بەغدا لەسەر پرسی بڕینی مووچەی فەرمانبەرانی هەرێمی کوردستان. 

 

لێدوانی فەرمی: دلێر عەبدولخالق، وتەبێژی بزووتنەوەی گۆڕان - باڵی کوردسات لە كۆنگرەیەكی رۆژنامەوانیدا ڕایگەیاند: پێویستە دامەزراوە نیشتمانییەکانی پەرلەمان و سەرۆکایەتیی هەرێمی کوردستان کارا بکرێن و بەزووترین کات حکومەتی نوێ پێکبهێنرێت تاوەکو بەرپرسیاربن لە گفتوگۆکردن لەگەڵ بەغدا. 

 

- وتەبێژی بزووتنەوەی گۆڕان لەبارەی هەڵوێستی گۆڕان لە کۆبوونەوەی لایەنە سیاسییەکان ڕایگەیاند: لە کۆبوونەوەکە بە ڕاشکاوی بە هەمووانمان وت کە بەغدا لە ساڵی 2014وە بەهۆی کێشە سیاسییەکانەوە سزای خەڵکی ئێمە دەدات، بۆیە پێویستە چارەسەرێکی ڕیشەیی بۆ ئەو پرسە بدۆزرێتەوە.

 

- باشترکردنی ژیانی خەڵک لە موزایەدەی سیاسی لایەنەکان گرانترە، چونکە خەڵک نان و مووچەی دەوێت نەک هەر یەکەو لەلایەکەوە یاری بە قووت و ژیانی خەڵکەوە بکات.

 

باکگراوند: ڕۆژی چوارشەممە 28-5-2025  وەزارەتی دارایی عێراق بە واژۆی تەیف سامى، وەزیری دارایی، هەرێمى کوردستانى ئاگادارکردەوە لەوەى لەمەبەدوا ناتوانێت مووچەی هەرێمی كوردستان ڕەوانە بكات.