لە سلێمانی کارەبای 28 گەڕەك 24 كاتژمێرییە

ئاڤا نیوز

 

هاوتەریب لەگەڵ شارەكانی دیکە، جێبەجێكردنی پڕۆژەی ڕووناكی لە سنووری شاری سلێمانی بەخێرایی بەڕێوەدەچێت و ئێستا دانیشتووانی 28 گەڕەكی شارەكە خاوەنی كارەبای 24 كاتژمێرین و كار بۆ گەیاندنی پڕۆژەكە بۆ ژمارەیەك گەڕەكی دیكەش دەكرێت.

 

وێنە گەورەکە: پڕۆژەی ڕووناکی کە کارەبای 24 کاتژمێری بۆ هاووڵاتییان دابین دەکات، لە بەشێکی زۆری شارە گەورەکان دەستی پێكردووە. بڕیاریشە لە کۆتایی ساڵی 2026 بگاتە هەموو هەرێمی کوردستان.

 
لێدوانی فەرمی: سیروان محەممەد، گوتەبێژی بەڕێوەبەرایەتیی كارەبای سلێمانی بە ئاڤا میدیای ڕاگەیاند: لە قۆناغی یەكەمی پڕۆژەی ڕووناكی لە شاری سلێمانی، دانیشتووانی 10 گەڕەك بوونە خاوەنی كارەبای 24 كاتژمێری كە بریتین لە 13 هەزار هاوبەشی كارەبا، چەند ڕۆژێكیشە كە قۆناغی دووەمی پڕۆژەكە كۆتایی هاتووە كە تیایدا 18 گەڕەك و شاری نیشتەجێبوون بوونە خاوەنی كارەبای 24 كاتژمێری.

 

- کۆی گشتی ئەو هاوبەشانەی لە قۆناغی دووەم لە شاری سلێمانی کارەباکەیان بووە 24 كاتژمێری, بریتین لە 25,813 هاوبەش کە  23,733 ماڵ و  2,080یان بازرگانین.

- ئێستا بە هەردوو قۆناغەكە 37 هەزار هاوبەشی كارەبا لە سلێمانی كارەباكەیان بووە بە 24 كاتژمێری.

- ئێستا لە 30 فیدەری دیكەوە ئامادەكاری دەكرێت بۆ ئەوەی كارەبای ژمارەیەك گەڕەكی دیكەی سلێمانی بكرێن بە 24 كاتژمێری.