دوو کەس لە ماوەت بەتۆمەتی ڕاوکردنی ماسی دەستگیر دەکرێن

ئاڤا نیوز

بەڕێوەبەرایەتیی پۆلیسی دارستان و ژینگەی سلێمانی، دەستگیرکردنی دوو هاووڵاتی بە تۆمەتی ڕاوکردنی ماسی ڕاگەیاند. هاوکات ژمارەیەک ماسی ڕاوکراو و چەند کەرەستەیەکی دیکەی ڕاوەماسی دەستی بەسەردا گیرا.

بڵاوکراوەی فەرمی: بەڕێوەبەرایەتیی پۆلیسی دارستان و ژینگەی سلێمانی ڕایگەیاند: تیمێکی بەشی پۆلیسی دارستان و ژینگەی ماوەت لە کاتی دەرچوون بۆ سەر چەمی دوو ئاوان، توانییان دوو کەس بەتۆمەتی ڕاوکردنی ماسی دەستگیر بکەن.

هەر بەگوێرەی بڵاوکراوەکەی بەڕێوەبەرایەتیی پۆلیسی دارستان و ژینگەی ماوەت، ژمارەیەک ماسی ڕاوکراو لەگەڵ دوو تۆڕ و سێ داو و یەک چەقۆ و یەک ئۆتۆمبێل دەستیان بەسەردا گیراوە.

زانیاریی زیاتر: پەڕاوی لێکۆڵینەوە لەسەر ئەم بابەتە ڕێکخراوە و ڕادەستی دادوەر کراوە، بۆ ئەوەی ڕێکاری یاسایی بگیرێتەبەر.

ئەوەی پێویستە بیزانیت: لە ڕۆژی 10-3-2025، بڕیاری قەدەغەی ڕاوە ماسی لە هەرێمی کوردستان چووەتە بوار جێبەجێکردنەوە، بڕیارەکە تا 20-6-2025، بەردەوام دەبێت.

بۆچی گرنگە: هەموو ساڵ لە وەرزی گەرا دانانی ماسیدا وەزارەتی کشتووکاڵ قەدەغەی ڕاوکردنی ماسی ڕادەگەیێنێت، ئەمەش لە پێناو پاراستن و هێشتنەوەی سامانی ماسییە.