موقتەدا سەدر: بەهیچ شێوەیەک ناومان لە هەڵبژاردن بەکارنەهێنرێت

ئاڤا نیوز

ڕێبەری ڕەوتی نیشتمانیی شیعە، بەکارهێنانی ناوی بنەماڵەکەی یان ناوی خۆی بەهەموو شێوەیەک "ڕاستەوخۆ و ناڕاستەوخۆ" تەنانەت بە ئاماژەش قەدەغە کرد، هاوکات دوو ڕێنمایی دیکەیشی لەبارەی بانگەشەی هەڵبژاردن دەرکرد.

ڕاگەیێنراوی فەرمی: موقتەدا سەدر، ڕێبەری نیشتمانیی شیعە ڕایگەیاند: قەدەغەیە و حەڕامە ناوی بنەماڵەی سەدر بە تایبەت (دوو شەهیدەکەی سەدر) بەکاربهێنرێت، قەدەغەیە بە هیچ شێوەیەک ناوی منیش بەکاربهێنرێت بە ڕاستەوخۆ یان ناڕاستەوخۆ بە ئاماژە یان بە لێدوانی ڕاشکاوانە لە هەر لایەنێکەوە.

- ڕێگەپێدراوە هەژاران لە هەڵمەتی بانگەشەی هەڵبژاردن ئەو شتانەی دابەش دەکرێت وەرگرن، تەنانەت لە گەندەڵکارانیش بێت، بەو مەرجەی نە دەنگیان پێبدەن نە کارتی هەڵبژاردنیش وەربگرن، "چونکە ئەمە پارەی تۆیە نەک پارەی ئەوان، ئەوانیش منەتبار نین بەسەر تۆدا"، گەندەڵکاران چەند بە چاک و باش خۆیان دەربخەن، هەر بە تاوانبار دەمێننەوە.

لەلایەکی دیکەوە: سەدر ڕێنمایی سێیەمی دەرکرد و وتی، "گوتم و دووبارەی دەکەمەوە، بێدەنگی ئێمە قسەکردنە، یەکێک لە ماناکانیشی ئەوەیە کە بێدەنگیمان لە بەرامبەر گەندەڵییەکانیان مانای ئەوە نییە کە ئێمە لێیان ڕازیین، بۆیە باوەڕیان پێ مەکەن".

ئەوەی پێویستە بیزانیت: بڕیارە مانگی تشرینی دووەمی ئەمساڵ، پرۆسەی هەڵبژاردنی پەرلەمانی عێراق بەڕێوەبچێت، ڕەوتی نیشتمانیی شیعە بڕیاری بایکۆتکردنی پرۆسەکەی داوە وەک هەڵوێستێک دژی "گەندەڵی و گەندەڵکاران".