سەرۆکی لوبنان لە بەغدایە و لەگەڵ سوودانی و لەتیف ڕەشید کۆدەبێتەوە

ئاڤا نیوز

 

سەرۆککۆماری لوبنان بە سەردانێکی فەرمی گەیشتە بەغدا و دۆسیەی پەیوەندییەکانی نێوان بەغدا و بەیرووت و چۆنیەتی گەشەپێدانی ئەو پەیوەندییانەی لەگەڵ سەرۆکوەزیران و سەرۆککۆماری عێراق تاوتوێ دەکات.

 

وێنە گەورەکە: لە ماوەی چەند ساڵی ڕابردوودا عێراق بەبەردەوامی بۆ دابینکردنی نەوت و وزە بۆ کارەبا هاوکاری لوبنان بووە، لەدوایین دەستپێشخەریشدا سەرۆکوەزیرانی عێراق بڕیاریدا بەبڕی 20 ملیۆن دۆلار هاوکاری ئاوەدانکردنەوەی لوبنان بێت.

 

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، محەممەد شیاع سوودانی، سەرۆکوەزیران لە فڕۆکەخانەی نێودەوڵەتیی بەغدا پێشوازیی لە جۆزیف عۆن، سەرۆکی لوبنان کرد، دواتریش کۆبوونەوەی هەردوولا بۆ تاوتوێکردنی پەیوەندییە دوو قۆڵییەکانی نێوان عێراق و لوبنان بەڕێوەچوو.

 

لەلایەکی دیکەوە: سەرۆکایەتیی کۆماری عێراقیش بڵاویکردەوە، د. لەتیف ڕەشید، سەرۆککۆماری عێراق لە کۆشکی سەرۆکایەتی لە بەغدا پێشوازی لە هاوتا لوبنانییەکەی کرد و هەردوولا چۆنییەتی زیاتر گەشەپێدانی پەیوەندییەکانی نێوان بەغدا و بەیرووتیان تاوتوێ کرد.