وتەبێژی سەربازیی سوودانی بۆ ئاڤا: ئاسایشی ناوچە کێشەلەسەرەکان هیچ مەترسییەکی لەسەر نییە

ئاڤا نیوز

 

وتەبێژی فەرماندەی گشتیی هێزە چەکدارەکانی عێراق بە ئاڤا میدیای ڕاگەیاند، هەماهەنگیی و کاری هاوبەش لەنێوان هێزەکانی پێشمەرگەی کوردستان و هێزەکانی عێراق بەردەوامە و لە ئاستێکی باڵادایە، جەختیش دەکاتەوە کە ئاسایشی ناوچە کێشەلەسەرەکان هیچ مەترسییەکی لەسەر نییە.

 

وێنە گەورەکە: بەگوێرەی دەستووری عێراق، هێزەکانی پێشمەرگەی کوردستان بەشێکن لە دامەزراوەی ئەمنی و سەربازیی عێراق و مافی ئەوەشیان هەیە لە ناوچە کوردستانییەکانی دەرەوەی ئیدارەی هەرێمی کوردستان بەشداربن لە دابینکردنی ئاسایش، بوونی هەماهەنگی هاوبەشیش لەنێوان هەردوولا زیاتر دابینکردنی ئارامی لێکەوتووەتەوە.

 

لێدوانی فەرمی: سەباح نوعمان، وتەبێژی فەرماندەی گشتیی هێزە چەکدارەکانی عێراق بە ئاڤا میدیای ڕاگەیاند، "لە بواری بەرەنگاربوونەوەی ماددە هۆشبەرەکان هەرێمی کوردستان ڕۆڵێکی زۆر گرنگ دەگێڕێت، هەماهەنگیش لەگەڵ هەرێمی کوردستان بۆ ڕووبەڕووبوونەوەی پاشماوەکانی داعش لە ئاستێکی باڵادایە".

 

ئاماژەی بەوەشکرد، "هەماهەنگیمان لەو ناوچانەی جێگەی گرنگی هاوبەشمانە (ناوچە کێشەلەسەرەکان) بەردەوامە و هیچ مەترسییەکی داعشیان لەسەر نەماوە، کارکردنیش بۆ دروستکردنی هێزی هاوبەش بۆ دابینکردنی ئاسایشی ئەو ناوچانە بەردەوامە".

 

پەیوەست بە دۆسیەی گواستنەوە و لێکۆڵینەوەی قوتابیانی خولی 89 کۆلێژی سەربازیی لە ناسریە، سەباح نوعمان گوتی، "لێکۆڵینەوەکان لەبارەی ڕووداوەکەی خولی 89ی کۆلێژی سەربازیی بەردەوامن و لیژنەکە بەگوێرەی فەرمانی فەرماندەی گشتیی هێزە چەکدارەکان کارەکانی خۆی دەکات، هاوکات سەرۆک ئەرکانیش قسەی بۆ قوتابییەکان کردووە و ئێستا ئەوان بۆ ناوچەی تاجی گوازراونەتەوە و دەستیان بە مەشقکردن کردووە، ئەوە ڕاست نییە کە بۆ شوێنی دیکەی جوگرافی گوازراونەتەوە".

 

هەرچی پەیوەستە بە پەیوەندییەکانی نێوان هێزی پێشمەرگە و دامەزراوە ئەمنییەکانی کوردستان لەگەڵ هێزەکانی حکومەتی فیدڕاڵ، سەباح نوعمان ڕایگەیاند: دامەزراوەی ئەمنی لە هەرێمی کوردستان بەشێکە لە هێزی سەربازی و دامەزراوەی ئەمنیی عێراق، هەموومان لە ژێر فەرمانی فەرماندەیی ئۆپەراسیۆنە هاوبەشەکان کاردەکەین کە ئەوان پلان دادەنێن و هەماهەنگی دەکەن بەگوێرەی ناوچەکان و ئەرک و وەزارەتەکان، هەماهەنگی لە بواری ئەمنیی لەنێوان ناوەند و هەرێم لە ئاستێکی باڵادایە بۆ ڕووبەڕووبوونەوەی پاشماوەکانی داعش، ئێستاش ئۆپەراسیۆنی هاوبەش و ئاڵوگۆڕی زانیاریی هەیە دژی تیرۆرستان، لەبواری بەرەنگاربوونەوەی ماددە هۆشبەرەکانیش کوردستان ڕۆڵێکی زۆر گرنگ دەگێڕێت بۆ پشتیووانی  دامەزراوەی ئەمنیی ئەویش بە دابینکردنی زانیاریی و هەماهەنگیی دژی بازرگانانی ماددەی هۆشبەر و ئەوانەی لە یاسا خۆیان شاردووەتەوە.

 

سەباح نوعمان دەشڵێت، "کار و هەماهەنگی و کاری هاوبەش لەو ناوچانەی جێگەی گرنگی هاوبەشمانە بەردەوامە کە پێشتر ئەوە بۆشاییەک بوو و داعش سوودی لێوەردەگرت بۆ گواستنەوە و پلاندانان و هێرشی تیرۆرستی بەڵام ئێستا لە ناوچانەدا بەگوێرەی هەماهەنگیی و پلانی فەرماندەی ئۆپەراسیۆنە هاوبەشەکان مامەڵە دەکەین، بەوهۆیەش ئەو ناوچانە بە تەواوی ئارام و ئاسایشن و مەترسییان لەسەر نییە، کارکردنیش بۆ دروستکردنی هێزی هاوبەش بۆ دابینکردنی ئاسایشی ئەو ناوچانە بەردەوامە".