مەسرور بارزانی: کوردستان بە بازاڕی ھەرێمی و نێودەوڵەتی دەبەستینەوە

ئاڤا نیوز

 

سەرۆکوەزیرانی کوردستان دووپاتی دەکاتەوە بەردەوام دەبن لەسەر  باشترکردنی گوزەرانی خەڵکی کوردستان، واژۆکردنی دوو گرێبەست لەگەڵ دوو کۆمپانیا ئەمریکییەکە بە نموونە دەهێنێتەوە و بە "داینەمۆی گەشەی ئابووری ڕەخساندنی هەلی کار" وەسفیان دەکات. بەڵێنیش دەدات خۆشگوزەرانی و گەشەی ئابوورییەکی گشتگیر بەدیبھێنن و کوردستان بە بازاڕی ھەرێمی و نێودەوڵەتی ببەستنەوە.

وێنە گەورەکە: مەسرور بارزانی، سەرۆکوەزیرانی کوردستان لە ئاهەنگی دەرچووانی زانکۆی ئەمریکی - کوردستان لە شاری دهۆک، وتارێکی پێشکەش کرد و چەند پەیامێکی نوێی ڕاگەیاند، بەڕوونی دیدگای خۆی بۆ حکومڕانی شی کردەوە، باسی لە پرۆژە نوێیەکانی حکومەت لە سەردەمی کابینەی نۆیەم و چاکسازییەکانی حکومەت لە بوارە جیا جیاکان و پلانی حکومەتیش بۆ داهاتوو کرد.

لێدوانی فەرمی: مەسرور بارزانی لە سەرەتای قسەکانیدا ئاماژەی بە پرۆسەی چاکسازی کرد لە سەرجەم بوارەکان و دەزگاکانی حکومەت، لەمبارەیەوە گوتی: "ئەم چاکسازییانە تەنیا بیرۆکە نین، بەڵکو ڕاستەوخۆ کاریگەری بەرچاویان دەبێت لە سەر باشترکردنی گوزەرانی خەڵکی کوردستان. ئێمە خۆشگوزەرانی و گەشەی ئابوورییەکی گشتگیر بەدیدەھێنین و کوردستان بە بازاڕی ھەرێمی و نێودەوڵەتی دەبەستینەوە".

کاریگەری و لێکەوتەکان: سەرۆکوەزیران سەردانەکەی بۆ ئەمریکا و واژۆکردنی دوو گرێبەست لەگەڵ کۆمپانیاکانی ئێچ کەی ئێن ئێنێرجی و وێسترین زاگرۆس بە بەهای 110 ملیار دۆلار لە بواری نەوت و گازدا، بە "سەرەتای قۆناخێکی زۆر باش" دانا بەم ئاراستەیەدا. گرێبەستەکانی بە"ستراتیژی" وەسف کرد و گوتی : "دەبنە داینەمۆی گەشەی ئابووری و وەبەرھێنان و داهێنان. لەوەش گرنگتر دەرفەتی کاری زۆر باش و ئاستبەرز لە سێکتەرە جیاوازەکانی کوردستان دەڕەخسێنن".

ئەو مانایەی دەگەیێنێت: لە وتارەکەیدا مەسرور بارزانی پێداگری لەسەر بەدەستهێنانی سەربەخۆیی ئابووریی گشتیگر کرد: "بۆ یەکەمجار لە مێژوودا، کوردستان ئەو پێشکەوتنەی نیشاندا کە ئەو سەربەخۆییە ئابوورییەی بەدەستمان ھێنا، بەھۆی نەوتەوە نەبووە، بەڵکو دنیابینییەکی ئابوورییانەیە کە لەسەر بنەمای پەرەپێدانی کەرتە نانەوتییەکان وەک بانکی و کشتوکاڵی داڕێژراوە". جەختیشی کردەوە "لەسەر بنەمای ئەم دنیابینییە بەردی بناغەی کوردستانێکی بەھێزتر و خۆڕاگر دادەنێین".

پێدراوە ڕاستەکان: مەسرور بارزانی کە لە ناوەڕاستی ساڵی 2019 سەرۆکایەتیی حکومەتی کوردستانی لەدەستە، ژمارەیەک پڕۆژەی ستراتیژی وەکو نموونە هێنایەوە کە لەو ماوەیەدا کردوویانە، لەوانە:

. دروستکردنی ڕێگا سەرەکییەکان لە ناوچە جیاوازەکانی ھەرێمی کوردستان.

 

.  دابینکردنی ئاو بەشێوەیەکی باش و فراوان، دروستکردنی بەنداوی نوێ بۆ پاراستنی داھاتوومان. 

. دابینکردنی کارەبایەکی بەردەوام لەڕێگەی (پرۆژەی ڕووناکی)یەوە، یەکێک لە گەورەترین ئاڵنگارییەکانمان دەگۆڕین بۆ گەورەترین دەستکەوت.

. پڕۆژەی هەژماری من بۆ نوێکردنەوە و مۆدێرنکردنی سیستمی بانکیمان کە ھاوشێوەی نیە لە ناوچەکەمان.

 . لە کارکردن بەردەوامین لە وەبەرھێنان لە ناوەندەکانی داھێنان و ھاندانی ھاوبەش لەنێوان زانکۆ و کەرتی تەکنەلۆجیادا لەڕێگەی ژیری دەستکردەوە.

.  لە هەوڵداین بۆ باشترکردنی سیستمی تەندروستی لە کوردستان و عێراق.

. لە کارکردن بەردەوامین بۆ گۆڕانێکی ستراتیژی لە سیستمی پەروەردە، میکانیزمەکانی دڵنیایی جۆریی بەهێز دەکەین، چاکسازیی کارگێڕی دەکەین، پشتیوانی دامەزراوەکانمان دەکەین  لەڕووی کارگێڕی و داراییەوە خۆیان بەڕێوەببەن.