شاندی ڕۆژئاوای کوردستان و دیمەشق لەسەر چەند خاڵێک ڕێککەوتن

ئاڤا نیوز

لە چوارچێوەی هەوڵەکان بۆ پتەوکردنی لێکتێگەیشتن و جێبەجێکردنی ڕێککەوتنە واژۆکراوەکان، شاندی باکوور و ڕۆژهەڵاتی سووریا (ئیدارەی خۆسەر) و حکومەتی دیمەشق لەسەر چەند خاڵێک ڕێککەوتن. هاوکات ڕێککەوتن کرا لەسەر دیاریکردنی دانیشتنێکی دیکە لە داهاتوویەکی نزیکدا، بۆ تەواوکردنی گفتوگۆکان و بەدواداچوون بۆ جێبەجێکردنی ئەوەی لەسەری ڕێککەوتوون.

وێنە گەورەکە: دوای ڕووخانی دەسەڵاتی ئەسەد، هەموو چاوەکان لەسەر ڕۆژئاوای کوردستانە و هەموو هەوڵێک دەدرێت ئیدارەی خۆبەڕێوەبەری خۆسەر "شاندی باکوور و ڕۆژهەڵاتی سووریا" و حکومەتی دیمەشق بگەنە ڕێكکەوتن، بۆ ئەم مەبەستە وڵاتانی دەرەکیش ڕۆڵیان گێڕاوە و چەند جارێکیش لەنێوان هەردوولا کۆبوونەوە کراوە و پێشتریش لەسەر چەند خاڵێک ڕێککەوتوون.

ڕاگەیێنراوی فەرمی: دوای کۆبوونەوەکەی نێوان شاندی باکوور و ڕۆژهەڵاتی سووریا و حکومەتی دیمەشق ڕاگەیێنراوێکی هاوبەشیان بڵاوکردەوە. بەگوێرەی ڕاگەیێنراوەکە لە کۆبوونەوەکەدا، هەردوولا کۆمەڵێک بابەتی جێی بایەخی  هاوبەشیان تاوتوێ کرد و لەسەر ئەمانەی خوارەوە رێککەوتن:

1. پێکهێنانی لیژنەی لاوەکی پسپۆری بۆ بەدواداچوونی جێبەجێکردنی ڕێککەوتنی 10ی ئازار کە لەنێوان مەزڵووم عەبدی، فەرماندەی گشتی هێزەکانی سووریای دیموکرات (هەسەدە) و ئەحمەد شەرع، سەرۆکی حکومەتی ڕاگوزەر واژۆ کراوە.

2. هەوڵدان بۆ چارەسەرکردنی کێشە هەڵپەسێردراوەکانی دۆسیەی تاقیکردنەوەکان و ناوەندەکانی تاقیکردنەوە، بە شێوەیەک کە مافی قوتابیان و سەلامەتی پرۆسەی پەروەردەیی مسۆگەر بکات.

3. گفتوگۆکردن لەسەر میکانیزمەکانی ئاسانکاری بۆ گەڕانەوەی ئاوارەکان بۆ ناوچەکانیان و کارکردن بۆ لابردنی ئەو لەمپەرانەی ڕێگری لەم گەڕانەوەیە دەکەن.

4. دووبارە کاراکردنەوەی دۆسیەی گەڕەکەکانی ئەشرەفیە و شێخ مەقسوود  کە دوو گەڕەکی کوردنشینی حەلەبن و هەوڵدان بۆ چارەسەرکردنی بە شێوەیەک کە خزمەت بە سەقامگیری و ئاشتیی کۆمەڵایەتی بکات.

لە هەمان کاتدا: هەردوولا جەخت لە پابەندبوونیان بە گفتوگۆی بوونیادنەر و هاوکاری بەردەوام کردەوە، بە شێوەیەک کە لە خزمەتی یەکڕیزی و سەروەریی سووریادا بێت و هیوا و ئاواتەکانی گەلی سووریا بۆ ئاسایش و سەقامگیری بەدیبهێنێت.