سەرۆکوەزیرانی بەریتانیا داوا لە سوپای وڵاتەکەی دەکات خۆیان بۆ جەنگ ئامادە بکەن

ئاڤا نیوز

سەرۆکوەزیرانی بەریتانیا پلانێکی ستراتیژی نوێ بۆ بەهێزکردنی سوپای بەریتانیا ڕادەگەیەنێت و داوا لە سوپا دەکات ئامادە بێت بۆ ڕووبەڕووبوونەوەی هەموو مەترسی و هەڕەشەکان.

وێنە گەورەکە: ئێستا بەریتانیا بە شێوەیەکی ناڕاستەوخۆ بووە بە بەشێک لە جەنگی ئۆکراینا و ڕووسیا، پشتیوانی بەردەوامی بەریتانیا لە کیێڤ لە ڕووی سەربازی و سیاسییەوە کاریگەری خراپی لەسەر پەیوەندییەکانی نێوان لەندەن و مۆسکۆ هەبووە، دوای بانگەوازەکەی کیەر ستارمەر بۆ دروستکردنی سوپایەکی هاوبەشی ئەوروپا بۆ بەرگریکردن لە ئۆکراینا و ئەوروپا، کرێملن توڕەیی خۆی بەرامبەر ئەو بانگەوازە دەربڕی و ڕایگەیاند: هەر سوپایەکی ئەوروپا لە ئۆکراینا بوونی هەبێت، واتای ڕاگەیاندنی جەنگە و بە تووندی وەڵام وەردەگرن.

لێدوانی فەرمی: کیەر ستارمەر، سەرۆکوەزیرانی بەریتانیا ئەمڕۆ لە میانەی وتارێکدا لە سکۆتلەندا ڕایگەیاند، ئێستا جیهان بە قۆناغێکی ئاڵۆزدا تێدەپەڕێت و پێویستە هەمیشە ئامادەی جەنگ بێت، "پلانی ستراتیژی نوێمان بۆ سوپای بەریتانیا ڕادەگەیەنین".

- ئامانج لە پلانی ستراتیژیی بەرگری بۆ سوپا، پڕچەکردنیەتی بە پێشکەوتووترین ئامێری جەنگی و دەبێت سوپای وڵات 10 هێندەی ئێستا بەهێزتر و کوشندەتر بێت، "دەبێت هەمیشە ئامادە بین بۆ ڕووبەڕووبونەوەی هەر مەترسی و هەڕەشەیەک بۆ سەر بەریتانیا و وڵاتانی ئەندامی ناتۆ، لە ئەگەری ڕوودانی جەنگ شانبەشانی هاوپەیمانەکانمان دەجەنگین".

زانیاریی زیاتر: بە پێی پلانەکەی کیەر ستارمەر، سەرۆکوەزیرانی بەریتانیا 12 ژێر دەریایی نوێ دروست دەکرێت، 15 ملیار پاوەند بۆ کڵاوەی ئەتۆمی و دروستکردنی موشەکی دوورمەودا تەرخان دەکرێت،  دروستکردنی چەندین جۆری نوێی چەک و فڕۆکەی بێفڕۆکەوان بەشێکن لە پلانە ستراتیژییەکەی ستارمەر.