ئەردۆغان: دانوستاندنەکانی ڕووسیا و ئۆکراینا سەرکەووتوانە بەڕێوەدەچن

ئاڤا نیوز

 

سەرۆککۆماری تورکیا ڕایدەگەیێنێ، دانوستاندنەکانی نێوان ڕووسیا و ئۆکراینا لە ئیستەنبووڵ بە سەرکەوتووانە ئەنجامدراون و بەرەو ئاشتی هەنگاو دەنێن.

 

وێنە گەورەکە: ڕۆژی دووشەممە، 2 – 6 – 2025،  دووەم گەڕی دانوستاندنە ڕاستەوخۆکانی نێوان ڕووسیا و ئۆکراینا لە ئیستەنبووڵ بەڕێوەچوو، بەڕێوەچوونی دانوستاندنەکان لەکاتێکدایە کە ڕۆژێک پێش کۆبوونەوەکە ئۆکراینا، گەورەترین هێرشی ئاسمانی کردە سەر فڕۆکەخانە سەربازییەکانی ڕووسیا، بەپێی ڕاپۆرتی دەزگای هەواڵگریی ئۆکراینا بەهۆی تێکشکاندنی مووشەک هەڵگر و فڕۆکە سەربازیەکان 7 ملیار دۆلار زەرەر و زیان بەر رووسیا کەوتووە.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە کۆبوونەوەی لەگەڵ وەزیر و بەرپرسانی حکومەت ئاماژەی بە دانوستاندنەکانی نێوان ڕووسیا و ئۆکراینا کرد و ڕایگەیاند، سەرەڕای بەرزبوونەوەی ئاستی هێرشە سەربازییەکانی نێوان ڕووسیا و ئۆکراینا بەڵام دانوستاندنەکان سەرکەوتووانە بەڕێوەدەچن و لێکتێگەیشتنی باش هەیە بۆ گەشتن بە ڕاگەیاندنی ئاگربەست و ڕێککەوتنامەی ئاشتی.

 

لەلایەکی دیکەوە: هاکان فیدان، وەزیری دەرەوەی تورکیا لە هەژماری خۆی لە پلاتفۆرمی ئێکس ڕایگەیاند، دانوستاندنەکانی نێوان ڕووسیا و ئۆکراینا هەنگاوێکی گرنگ بەرەوپێشچوونی بەخۆیەوە بینیووە، سەرنجی وەفدی هەردوو دەوڵەت لەسەر ئەنجامەکان و هەوڵدان بۆ کەمکردنەوەی ناکۆکیەکان، بابەتێکی گرنگە و پێشوازی لێدەکەین.