عێراق و ئەمریکا: ئەرکی هاوپەیمانی نێودەوڵەتی لە وادەی دیاریکراوی خۆیدا کۆتایی دێت

ئاڤا نیوز 

 

ڕاوێژکاری ئاسایشی نیشتمانیی عێراق و هەڵسوڕێنەری باڵیۆزخانەی ئەمریکا لە بەغدا جەخت لە کۆتاییهاتنی ئەرکی هاوپەیمانی نێودەوڵەتی دەکەنەوە بەپێی ئەو کاتەی لە نێوان عێراق و هێزەکانی هاوپەیمانی نێودەوڵەتیدا ڕێککەوتنی لەسەر کراوە.

 

وێنە گەورەکە: بەغداو واشنتن لەسەر کۆتاییهاتنی ئەرکی هاوپەیمانی نێودەوڵەتی تاوەکو ئەیلوولی ساڵی 2026 ڕێککەوتوون، بەڵام بابەتی کشانەوەی هێزەکان گۆڕاوە بۆ هاوبەشی ئەمنیی دوولایەنە، بەشێوەیەک پاڵپشتی هێزە عێراقییەکان بکات لەپێناو کەمکردنەوەی مەترسیی داعش.

 

چیرۆکی سەرەکی: قاسم ئەعرەجی، ڕاوێژکاری ئاسایشی نیشتمانیی عێراق لە نووسینگەی خۆیدا پێشوازی لە ستیڤن ڤاگن، هەڵسوڕێنەری باڵیۆزخانەی ئەمریکا لە بەغدا کرد. لە دیدارەکەدا باسیان لە پەیوەندییە دووقۆڵییەکانی نێوان بەغدا و واشنتۆن و گرنگی پتەوکردنی هاریکاری نێوان هەردوو وڵات کرد، بۆ بەدیهێنانی ئاسایش و سەقامگیری لە ناوچەکە و جیهاندا.

 

ڕاگەیێنراوی فەرمی: بەگوێرەی ڕاگەیێنراوی نووسینگەی ڕاوێژکاری ئاسایشی نیشتمانیی عێراق کە وێنەیەکی دەست ئاڤا میدیا کەوتووە، لە میانی کۆبوونەوەکەدا، گفتوگۆ لەبارەی دوایین پێشهاتەکانی سەر گۆڕەپانی هەرێمی و نێودەوڵەتی کرا، هەروەها هەردوو لا جەختیان لەسەر پشتیوانیکردنی سەقامگیری لە سووریا کردەوە.

 

- ئەعرەجی جەختی لەوە کردەوە کە دیپلۆماسی باشترین ڕێگەچارەیە بۆ چارەسەرکردنی ناکۆکییە هەرێمی و نێودەوڵەتییەکان، ئاماژەی بەوەشکرد "عێراق پشتیوانی لە ڕێککەوتنی نێوان ئێران و ئەمریکا دەکات لە ڕێگەی دانوستان و گفتوگۆوە.

 

- ستیڤن ڤاگن ستایشی ڕۆڵی کاریگەری حکومەتی عێراقی کرد لە مامەڵەکردن لەگەڵ قەیرانە ناوخۆیی و دەرەکییەکاندا."

 

- هەردوو لا جەختیان لەسەر "کاراکردنی ڕێککەوتننامەی چوارچێوەی ستراتیژی واژۆکراو لە نێوان عێراق و ویلایەتە یەکگرتووەکانی ئەمریکا و پشتیوانیکردنی وەبەرهێنان لە عێراق کردەوە.

- هەردوو لا دووپاتیان کردەوە کە ئۆپەراسیۆنی 'ورەی پۆڵایین' ئەرکەکەی کۆتاییدێت بەپێی ئەو خشتە کاتییەی لە نێوان حکومەتی عێراق و هاوپەیمانی نێودەوڵەتیدا ڕێککەوتنی لەسەر کراوە.

 

- سەبارەت بە دۆسیەی کەمپی ئاوارەکانی هۆل کە خێزان و منداڵانی چەکدارەکانی داعش لەخۆ دەگرێت، ئەعرەجی جەختی لەوە کردەوە کە حکومەتی عێراق لە مانگی ئەیلوولی داهاتوودا کۆنفرانسێک لە جنێڤ ساز دەکات، بەمەبەستی گەڕاندنەوەی خێزانەکان لە کەمپەکەوە بۆ وڵاتەکانی خۆیان.

 

قووڵتر:  کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی دەکات، نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراونەتەوە، 18 هەزاریان عێراقین، بەغداش جەخت لە گەڕانەوەی هەموویان دەکاتەوە.

 

باکگراوەند: هاوپەیمانیی نێودەوڵەتی دژی داعش بە سەرۆکایەتیی ئەمریکا لە ساڵی 2014 پێکهێنراو و لە ساڵی 2017 توانرا ڕێکخراوی تیرۆریستی داعش لە عێراق شکستپێبهێنن،  تاوەکو ئێستا هێزە ئەمنییەکانی عێراق لەگەڵ هاوپەیمانان بەردەوامن لە بە ئامانج گرتنی شانە نووستووەکانی داعش لە پارێزگاکانی نەینەوا، کەرکووک، سەڵاحەدین، ئەنبار و دیالە.