هەر ئاژەڵێک لە دەرەوەی کوشتارگەکان بکرێت بە قوربانی دەستی بەسەردا دەگیرێت

ئاڤا نیوز

 

بەهۆی بڵابوونەوەی نەخۆشی تای خوێنبەربوون لە عێراق و هەرێمی کوردستان، ڕێککارەکانی خۆپارێزی تۆندوتۆڵکراون و بۆ جەژنی قوربانیش ڕێککاری توندتر دەگیرێتە بەر.

 

وێنە گەورەکە: قوربانیکردن و سەربڕینی ئاژەڵ لای موسوڵمانان یەکێکە لە سیما دیارەکانی جەژنی قوربان، ساڵانە لە هەرێمی کوردستان سەدان سەر ئاژەڵ دەکرێتە قوربانی و بەشێکیشی لەنێو ماڵەکاندا سەردەبڕدرێت، بەڵام ئەمساڵ بەهۆی بڵاوبوونەوەی تای خوێنبەربوون و بۆ ڕێگریکردن لە زیاتر تەشەنەسەندنی نەخۆشییەکە، بەر لە جەژنی قوربان چەند ڕێککارێکی نوێ گیراوەتە بەر و داوا لە هاووڵاتیان دەکرێت، لە کوشتارگەکان ئاژەڵ سەرببڕن، هەرکەسێکیش لە کۆڵان و شوێنە گشتییەکان قوربانی بکات، سزا دەدرێت و ئاژەڵەکەش دەستی بەسەردا دەگیرێت.

 

لێدوانی فەرمی: هەڵمەت هەمزە، بەڕێوەبەری کوشتارگەی هەولێر بە ئاڤا میدیای ڕاگەیاند، "لە کوشتارگەی هەولێر ئامادەکاریی تەواو بۆ جەژنی قوربان کراوە و تیمی پزیشکی زیاد کراوە، پشکنین بۆ ئاژەڵەکان دەکرێت پێش سەربڕین و دوای سەربڕین، ڕۆژانە 12 کاتژمێر کوشتارگەکان کراوە دەبن".

هەڵمەت هەمزە داوا لە هاونیشتمانییان دەکات، "ئاژەڵەکانیان بهێنن بۆ کوشتارگەکان بۆ ئەوەی پارێزراو بن لە نەخۆشی و بەشێوەیەکی تەندروست لێرە ئاژەڵەکانیان بۆ سەردەبڕدرێت".

 

بەڕێوەبەری کوشتارگەی هەولێر هۆشداری دەدات و دەڵێت، "بە گشتی لە سێ شوێن ئاژەڵ سەردەبڕێت، لە ماڵان و کۆڵانەکان و گۆڕەپانی فرۆشتنی ئاژەڵان، بۆ ڕۆژانی جەژن مەفرەزە لە زۆر شوێن دادەنرێت، ناتوانین 100% قوربانی لە ماڵان قەدەغە بکەین، بەڵام لە شوێنە گشتییەکان بەهەموو شێوەیەک ڕێگری لێدەکرێت و هەرکەسێک ببینرێت ئەو کارە بکات، دەستگیر دەکرێت و پێبژاردنی بۆ دەکرێت و ئاژەڵەکەش دەستی بەسەردا دەگیرێت".

 

ئەوەی پێویستە بیزانیت: پێشبینی دەکرێت ئەمساڵ بەراورد بە ساڵانی ڕابردوو کەمتر قوربانی بکرێت. بەپێی ئامارەکان لە ساڵی 2023، نزیکەی هەزار و 872 سەر ئاژەڵ کراوە بە قوربانی، لە ساڵی 2024، ڕێژەکە کەمتربووە و هەزار و 28 سەر ئاژەڵ سەربڕدراوە، بۆ ئەمساڵیش بەهۆی نەهاتنی مووچە و بڵاوبوونەوەی نەخۆشی تای خوێنبەربوون، پێشبینی دەکرێت ڕێژەکە کەمتریش بێت.