ئێران: ئومێدەوارین لاپەڕەیەکی نوێ لە پەیوەندییەکانمان لەگەڵ لوبنان ھەڵبدەینەوە

ئاڤا نیوز

عەباس عێراقچی، وەزیری دەرەوەی ئێران دەڵێت، بەرژەوەندی ئێران بۆ یارمەتیدان و پاڵپشتیکردنی لوبنان لە بوارە ئابووری، سیاسی و کۆمەڵایەتییەکاندا، لەسەر بنەمای ڕێزگرتن لەیەکتر و پتەوترکردنی ھاریکاریی نێوان دوو وڵاتە.

چیرۆکی سەرەکی: ڕۆژی سێشەممە وەزیری دەرەوەی ئێران، عەباس عێراقچی بەسەردانێک گەیشتە بەیروتی پایتەختی لوبنان و لەگەڵ گەورە بەرپرسانی وڵاتەکە کۆبووەوە.

بڵاوکراوەی فەرمی: عەباس عێراقچی لە ھەژماری تایبەتی خۆی لە تۆڕی کۆمەڵایەتی ئێکس، نووسیوویەتی: "زۆر خۆشحاڵ بووم کە دووبارە گەڕامەوە بۆ بەیروت کە بە جیا لەگەڵ سەرۆککۆمار، سەرۆکی ئەنجوومەنی نوێنەران، سەرۆکوەزیران و وەزیری دەرەوەی لوبنان کۆبوومەوە"، ئومێدەوارین لاپەڕەیەکی نوێ لە پەیوەندییەکانمان لەگەڵ لوبنان ھەڵبدەینەوە.

زانیاریی زیاتر: عێراقچی دەڵێت: لە کۆبوونەوەکەدا، پاڵپشتی ئێرانم بۆ سەروەریی و پاراستنی خاکی لوبنان، ھەروەھا دووبارە ئاوەدانکردنەوەی ئەو وڵاتە، دووپات کردەوە.