دۆسیەی قەرەبووكردنەوەی خەڵكی شنگال و قەحتانیە دەبرێتە بەغدا

ئاڤا نیوز

نوێنەری دەڤەری شنگال لە پەرلەمانی عێراق دۆسیەی قەرەبووكردنەوەی خەڵكی قەزای شنگال و ناحیەی قەحتانیە دەباتە بەغدا و لەگەڵ وەزیری دادی حكومەتی عێراق، تاوتوێی دەكات.

وێنە گەورەكە: بەهۆی داخستنی نووسینگەی ماددەی 140 لە شنگال دوای هێرشەكانی داعش، هەنگاوەكانی قەرەبووكردنەوەی ئاوارەكانی سنووری پارێزگای نەینەوا، بەتایبەت خەڵكی شنگال و ناحیەی قەحتانیە ڕاگیرا، هاوكات لیژنەی تایبەتمەند بە کردنەوەی نووسینگەکان لە ئەنجوومەنی نوێنەرانی عێراق، کارەکانی وەستاندووە، بەشی زۆری کارابوونەوەشی پەیوەستە بە هەڵبژاردنی سەرۆکێکی نوێ بۆ ئەنجوومەنەکە.

چیرۆكی سەرەكی: مەحما خەلیل، پەرلەمانتاری كورد لە ئەنجوومەنی نوێنەرانی عێراق، لە دیوانی وەزارەتی دادی حكومەتی فیدراڵی، لەگەڵ د. خالید شوانی، وەزیری داد كۆبووەوە، بەمەبەستی تاوتوێكردنی ژمارەیەك دۆسیەی یاسایی و دادوەری و خزمەتگوزاریی دیكەی پارێزگای نەینەوا، بەتایبەت دۆسیەی قەرەبووكردنەوەی خەڵكی شنگال و ناحیەی قەحتانیە.

لێدوانی فەرمی: پەرلەمانتار مەحما خەلیل، ڕایگەیاند، داوای لادانی كۆسپ و بەربەستە ئیداری و ڕۆتینییەكانی كردووە بۆ گەیشتنی هاووڵاتیان بە مافی قەرەبووكردنەوەیان كە یاسا ئەو مافەی پێداون، ئەمەش لەپێناو هێنانەدی دادپەوەری و خزمەتكردنی هاووڵاتیانی ئەو سنوورە.

بابەتە ستراتیژییەكە: پەرلەمانتارەكەی دەڤەری شنگال پرسی تۆمارە سووتاوەكانی تاپۆی دەڤەری شنگالی لەگەڵ وەزیری دادی عێراق تاوتوێ كرد، كە مێژووەكەی دەگەڕێتەوە بۆ ساڵانی 1986 تاوەكو 1996، تایبەت بە موڵكی هاووڵاتیانی ڕەسەنی ناوچەكانی شنگال، بەعاج، قەیرەوان، قەحتانیە و دەوروبەریان، وەزیری دادی عێراق بەڵێنی دا بە كردنەوەی سەرووی 5 هەزار دۆسیەی تاپۆی موڵك كە كۆپی ڕەسەنیان لە ناوچەكانی خۆیان سووتاوە و كۆپیەك لە تۆماری دۆسیەكان لە بەغدا ماوە، كە بەفەرمی ئەو كۆپیانە بەشێوەی پەسەندكراوی ڕەوانەی پارێزگای نەینەوا دەكرێت بە لەبەرچاوگرتنی ڕێكخستنەوەیان بەشێوەیەكی یاسایی و ڕێكاری ئیداری.

لەلایەكی دیكەوە: مەحما خەلیل كە نوێنەری پێكهاتەی كوردانی ئێزدییە لە پەرلەمانی عێراق، داواشی لە وەزیری دادی عێراق كرد، كە حكومەتی فیدراڵی مامەڵەیەكی مرۆڤانە و دادپەروەرانە لەگەڵ ئەو كوردە ئێزدیانە بكات كە بەهۆی بارودۆخی جەنگ و كاولكاری، بەناچاری پەنایان بۆ تاوان و كاری هەڵە بردووە و سزای لەسێدارەدانیان بۆ دەرچووە، وەزیری دادی عێراق دووپاتی كردەوە، هیچ كوردێكی ئێزدی لەسەر دۆسیەی تاوانكاری هێشتا لەسێدارە نەدراوە و بەڵێنی دا سەرجەم دۆسیەكان بە وردی پێداچوونەوەیان بۆ دەكرێت و سەرنجەكان بە هەند وەردەگیرێن.