لە نەجەف 10 فەرمانبەر بە تۆمەتی گەندەڵی و مامەڵەی وەهمی دەستگیر کران

ئاڤا نیوز

دەستەی دەستپاکیی عێراق، ئاشکرای کرد  توانیویانە 10 فەرمانبەر لە فەرمانگەی شارەوانیی نەجەف و کارگەی چیمەنتۆی کوفە دەستگیر بکەن، هۆکارەکەش دەگەڕێتەوە بۆ ئەنجامدانی مامەڵەی خەرجکردنی پارە و پشکنینی وەهمی.

چیرۆکی سەرەکی: ئەمڕۆ هەینی تیمێکی سەر بە نووسینگەی لێکۆڵینەوەی نەجەف، هەڵمەتێکیان بۆ ناو کارگەی چیمەنتۆی کوفە ئەنجامداوە و لەوێ هەشت فەرمانبەریان دەستگیرکرد، کە هەڵساون بە ڕێکخستنی مامەڵەیەکی وەهمی بۆ کڕین و دابینکردنی 401 تۆپی پۆڵایی کە ئامێرێکە بۆ هاڕینی بەرد بەکاردێت، بۆ کۆمپانیای گشتیی چیمەنتۆ لەگەڵ کۆمپانیایەکی بەڵێندەرایەتی، کە بڕی گرێبەستەکە زیاتر لە سێ ملیار دینار بووە.

لێدوانی فەرمی: دەستەی دەستپاکی لەبارەی وردەکاریی گەندەڵییەکەی کارگەی چیمەنتۆ ڕایگەیاندووە: لە کاتی پشکنیندا دەرکەوتووە سەرچاوەی ماددەکان پێچەوانەی یاسا بووە و پسووڵەی نایاسایی بۆ کراوە و پارەی وەهمی خەرجکراوە لە ڕێگەی تۆمارکردنی بارکردن و بەتاڵکردنەوەی هەمان ماددە بۆ چەندین جار لەناو کارگەکەدا.

دەستەکە ئاماژەیان بەوە کردووە، جیاوازی هەبووە لە ژمارەی ئۆتۆمبێل و کاتی هاتنەژوورەوەی کەرەستەکان و ئەو بڕەی داخڵ کراوە، پرۆسەی خەرجکردنی پارەکە تەنیا بە وێنەی فۆتۆکۆپی پسووڵەی هاتنەژوورەوە کراوە بەبێ بوونی پسووڵەی ڕەسەن.

لەلایەکی دیکەوە: لە ئۆپەراسیۆنێکی جیادا، تیمەکانی دەستپاکی لە بەڕێوەبەرایەتیی شارەوانیی نەجەف (یەکەی وەرشەی باشوور)، دوو فەرمانبەری دیکەیان دەستگیرکردووە، ئەم دوو فەرمانبەرە زیانیان بە پارە و بەرژەوەندیی فەرمانگەکەیان گەیاندووە لە ڕێگەی ڕێکخستنی مامەڵەی چاککردنەوەی 17 ئامێر و ئۆتۆمبێل بەشێوەی وەهمی.

بۆ هەردوو دۆسیەکە، پەڕاوی لێکۆڵینەوە بەپێی ماددەکانی 331 و 340 بۆ کراونەتەوە و ڕەوانەی بەردەم دادوەری دادگای لێکۆڵینەوەی نەجەف کراون