حاجییان لەسەر چیای عەرەفات گەورەترین پایەی حەج ئەنجام دەدەن

ئاڤا نیوز

ئەمڕۆ پێنجەشەممە کە دەکاتە ڕۆژی عەرەفات بە ملیۆنان موسڵمان لە سەرانسەری جیهان یەکێک لە پیرۆزترین پایەی ئیسلامی ئەنجام دەدەن ئەویش وەستانە لە کێوی عەرەفات.

وێنە گەورەکە: ڕۆژی عەرەفە دەکاتە نۆی مانگی زولحیجە, بە یەکێک لە گەورەترین و پیرۆزترین ڕۆژەکانی ساڵ لە ئاینی ئیسلام دادەنرێت، ئەو ڕۆژەیە کە حاجییان گەورەترین پایەی فەریزەی حەج بەئەنجام دەگەیەنن, کە ئەویش وەستانە لە کێوی عەرەفات، ئەم وەستانەش بە  گەورەترین پایەی فەریزەی حەج دادەنرێت.

ژمارەکان وادەڵێن: بەپێی ئامارە بڵاوکراوەکان، زیاتر لە ملیۆنێک و 500 هەزار حاجی لە دەرەوەی شانشینی سعوودیە و 150 هەزار حاجی لە ناوخۆی سعودییە ئەمساڵ حەج دەکەن و ئەمڕۆ لەسەر چیای عەرەفات وەستاون.

زانیاریی زیاتر: مانگی زولحیجە مانگی دوازدەیەمینە لە مانگەکانی ساڵی کۆچی، یەکێکە لە مانگە حەرامەکان، کە نابێت جەنگی تێدا بکرێت، لە قورئانی پیرۆزدا ئاماژە بەوە کراوە کە چوار مانگ لە دوازدە مانگەکەی ساڵ بە مانگە حەرامەکان دادەنرێت کە ئەوانیش بریتین لە زولقوعدە, زولحیجە, موحەڕەم, ڕەجەب.