ترەمپ و شی گفتوگۆیەکی تەلەفۆنی ئەنجام دەدەن

ئاڤا نیوز

 

دۆناڵد ترەمپ، سەرۆکی ئەمریکا لەگەڵ شی جینپینگ، سەرۆکی چین، پەیوەندییەکی تەلەفۆنی ئەنجام دا.

 

وێنە گەورەکە: چین و ئەمریکا وەکو دوو گەورەترین ئابووریی جیهان، پەیوەندییەکی ئاڵۆز و گرنگیان لەنێوانیاندا هەیە، تاوەکو ئێستا پەیوەندییەکانیان بە چەندین هەورزا و نشێویدا تێپەڕێوە، بەشێوەیەکی گشتیی پەیوەندی ئەو دوو وڵاتە لە بواری بازرگانی و گۆڕانی کەشوهەوا و دۆخی تایوان خۆی دەبینێتەوە. 

 

ڕاگەیێنراوی فەرمی: ئاژانسی شینخوای چینی، هەواڵەکەی ڕاگەیاند و ئاشکرای کرد کە پەیوەندییە تەلەفۆنییەکە لە سەر داوای ترەمپ بووە و هەر دوو سەرۆک سەبارەت بە پەیوەندییە دووقۆڵییەکانی نێوانیان وڵاتەکانیان گفتوگۆیان کردووە.

 

زانیاریی زیاتر: ئەم پەیوەندییە تەلەفۆنییە لە کاتێکدایە کە پەیوەندییەکانی نێوان ئەمریکا و چین بەهۆی ناکۆکییە بازرگانییەکانی نێوانیان لە ناسەقامگیریدان.

 

بەتەنیشت ئەم بابەتەوە: ڕۆژێک پێشتر، ترەمپ لەگەڵ ڤلادیمیر پووتین، سەرۆکی ڕووسیا، پەیوەندییەکی تەلەفۆنیی هاوشێوەی ئەنجام دا.

 

لەلایەکی دیکەوە: سەرۆکی ئەمریکا، سەبارەت بە پەیوەندییە تەلەفۆنییەکەی لەگەڵ شی جینپینگ، سەرۆکی چین، نووسینێکی بڵاوکردەوە و پەیوەندییەکەی بە "زۆر باش" وەسف کرد، لە تروس سۆشیاڵ نووسیویەتی: پەیوەندییەکی تەلەفۆنیی زۆر باشم لەگەڵ سەرۆک شی، سەرۆکی چین، ئەنجام دا. باسی هەندێک لە ئاڵۆزییەکانی ڕێکەوتننامەی بازرگانییمان کرد کە بەم دواییانە بەستمان و لەسەری ڕێککەوتوون.

- پەیوەندییەکە نزیکەی یەک کاتژمێر و نیو خایاند و ئەنجامێکی زۆر ئەرێنی بۆ هەردوو وڵات هەبوو. چیدی نابێت هیچ پرسیارێک سەبارەت بە ئاڵۆزیی بەرهەمە دەگمەنەکانی زەوی هەبێت. تیمەکانمان بەم نزیکانە لە شوێنێکدا کۆدەبنەوە کە دواتر دەستنیشان دەکرێت.

- ئێمە لەلایەن وەزیری گەنجینە سکۆت بێسێنت، وەزیری بازرگانی هاوارد لوتنیک و نوێنەری بازرگانیی ئەمریکا، باڵیۆز جەیمیسۆن گریرەوە نوێنەرایەتیی دەکرێین. لەکاتی گفتوگۆکەدا، سەرۆک شی بە میهرەبانییەوە خانمی یەکەم و منی بانگهێشتی سەردانی چین کرد و منیش بە هەمان شێوە وەڵامم دایەوە.

- وەک سەرۆکی دوو وڵاتی گەورە، ئەمە شتێکە کە هەردووکمان چاوەڕوانی ئەنجامدانی دەکەین. گفتوگۆکە بەنزیکەیی هەمووی لەسەر بازرگانی بووە. هیچ باسێک لەسەر ڕووسیا/ئوکرانیا، یان ئێران نەکرا. کات و شوێنی کۆبوونەوەکەی کە بەم زووانە دەکرێت بە میدیاکان ڕادەگەیێنین. سوپاس بۆ سەرنجتان بەم بابەتە!"