مەسرور بارزانی: حکومەتی فیدراڵی سزای بە کۆمەڵی هاووڵاتییانی هەرێمی کوردستان دەدات

ئاڤا نیوز

سەرۆکوەزیرانی کوردستان بە بۆنەی جەژنی قوربان، پەیامێکی پیرۆزبایی بڵاوکردەوە و دەڵێت: ئەم جەژنە لە دۆخێکی سەختی داراییدا دەکەینەوە بە هۆی سزادانی بە کۆمەڵی هاووڵاتییانی هەرێمی کوردستان لەلایەن حکومەتی فیدراڵەوە.

ڕاگەیێنراوی فەرمی: مەسرور بارزانی، سەرۆکوەزیرانی کوردستان لە پەیامێکیدا دەڵێت: گەرمترین پیرۆزبایی ئاراستەی گشت موسڵمانانی هەرێمی کوردستان و عێراق و جیهان دەکەم، بە تایبەتی جەژن لە پێشمەرگە قارەمانەکان و هێزەکانی ئاسایشی ناوخۆ و کەسوکار و بنەماڵەی سەربەرزی شەهیدان و ئەنفالکراوان پیرۆز بێت.

سەرۆکوەزیرانی کوردستان لە بەشێکی دیکەی پەیامەکەی نیگەرانی قوڵی خۆی دەردەبڕێت و دەڵێت: جێی داخ و نیگەرانییەکی قووڵە، ئەم جەژنە لە دۆخێکی سەختی داراییدا دەکەینەوە، بە هۆی سزادانی بە کۆمەڵی هاووڵاتییانی هەرێمی کوردستان لەلایەن حکومەتی فیدراڵەوە.

سەرۆکوەزیرانی کوردستان دڵنیایی دەدات کە حکومەتی هەرێمی کوردستان، هەموو هەوڵێک دەخاتەگەڕ بۆ تێپەڕاندنی ئەم دۆخە و دەڵێت: هەموو هەوڵێک دەدەین بۆ لابردنی ئەم ستەمە ناڕەوایەی بەرامبەر مووچەخۆرانی هەرێمی کوردستان دەکرێت.