ئاڤا حوكمی شەرعیی نوێژی جەژن لە ڕۆژی هەینیدا ڕوون دەكاتەوە

ئاڤا نیوز

 

ڕۆژی یەكەمی جەژنی قوربانی پیرۆز، هاوكاتە لەگەڵ ڕۆژی هەینی كە موسوڵمانان بۆ ئەنجامدانی نوێژی بەكۆمەڵ، دووجار سەردانی مزگەوتەكان دەكەن، یەكێتی زانایانی ئایینی ئیسلامیش دووپاتی دەكاتەوە، نوێژی جەژن و نوێژی هەینی دوو ڕێوڕەسمی جیاوازن و هیچ كامیان قەرەبووی ئەوەی تر ناكاتەوە.

 

وێنە گەورەكە: سبەی دوای خۆرهەڵاتن سەعات 5:10 خولەكی بەیانی بەكاتی هەولێر، ڕێوڕەسمی نوێژی جەژن لە مزگەوتەكان بەڕێوەدەچێت و دواتریش نوێژخوێنان گوێبیستی وتاری جەژن دەبن، لە بڵندگۆی مزگەوتەكانیش تەكبیراتی جەژن دەخوێندرێت.

 

ئەوەی پێویستە بیزانیت: لەماوەی ڕابردوودا دەنگۆی ئەوە دروستبوو، بەوەی كە لەكاتی كۆبوونەوەی نوێژی جەژن و نوێژی هەینی لە یەك ڕۆژدا، ئەوا بەشداریكردنی نوێژخوێنان لە یەكێكیان فەرزە و ئەوەی تریان پێویست نییە، یەكێتی زانایانی ئایینی ئیسلامی كوردستان بەفەرمی ئەو دەنگۆیەی ڕەتكردەوە و ڕایگەیاند، ئەو بابەتە مشتومڕ هەڵناگرێت و باشتر وایە موسوڵمانان بەشداری هەردوو نوێژی بەكۆمەڵ بن و هیچ كامیان نابێتە بەدیلی ئەوەی تریان.

 

لێدوانی فەرمی: د. عەبدوڵڵا شێرکاوەیی، وتەبێژی یەکێتیی زانایانی ئایینی ئیسلامی كوردستان، تایبەت بە ئاڤا میدیا ڕایگەیاند: ئەمساڵ جەژنی قوربان کەوتووەتە ڕۆژی هەینی، هەربۆیە مامۆستای ئایینی لەكاتی نوێژی جەژن و لەكاتی نوێژی هەینیش، دووجار وتار دەخوێنێتەوە.

- وتەبێژی یەکێتیی زانایانی ئایینی ئیسلام دووپاتیشی كردەوە، نوێژی بەکۆمەڵی هەینی، هیچ پەیوەندییەکی بە نوێژی جەژنەوە نییە، دوو ڕێوڕەسمی جیاوازن.