وادەی کردنەوەی فڕۆکەخانەکانی ناسرییە و کەربەلا دیاری دەکرێت

ئاڤا نیوز

وەزارەتی گواستنەوەی عێراق ئاشکرایکرد، پڕۆژەی دروستکردن و نۆژەنکردنەوەی چەندین فڕۆکەخانەی نێودەوڵەتیی لە عێراق لە تەواوبووندان، هەردوو فڕۆکەخانەی ناسرییە و کەربەلاش لەداهاتوویەکی نزیکدا دەکرێنەوە.

بۆچی گرنگە: گەشتکردنی هاووڵاتییانی عێراق  لە ڕێگەی فڕۆکەخانەوە بە هەنگاوێکی وەرچەرخێنەر دادەنرێت بەرەو بەستنەوەی پارێزگاکانی عێراق بە جیهانەوە، ئەمەش دەبێتە هەنگاوێک بۆ گەشەپێدانی ئابووری پارێزگاکان.

لێدوانی فەرمی: مەیسەم سافی، گوتەبێژی وەزارەتی گواستنەوەی عێراق ڕایگەیاند: پڕۆژەی فڕۆكەخانەی نێودەوڵەتیی ناسرییە کە ڕێژەی جێبەجێکردنی لە کاتی ڕادەستکردنیدا پێش چەند ساڵیک لەمەوبەر تەنیا 3% بوو، زۆربەی کارەکانی تەواو بووە و لە کۆتایی ئەمساڵدا دەکرێتەوە.

زانیاریی زیاتر: بە گوتەی سافی، پڕۆژەی دروستکردنی فڕۆكەخانەی کەربەلاش لە تەواو بووندایە، پێشبینی دەکرێت لە کۆتایی ئەم ساڵ 2025 تەواو بکرێت و بکرێتەوە. 

لەلایەکی دیکەوە: دوای تەواو بوونی کاروباری نۆژەنکردنەوەی، بڕیارە رۆژی 10-6-2025 فڕۆکەخانەی نێودەوڵەتیی موسڵ بەشێوەی ئەزموونی بکرێتەوە.