ئێران بۆ ئەمریکا: بڕیارەکەتان بۆ قەدەغەی گەشت بۆ ئەمریکا ڕەگەزپەرستانەیە

ئاڤا نیوز

تاران بڕیاری دۆناڵد ترەمپ، سەرۆکی ئەمریکا، بۆ قەدەغەی گەشتی هاووڵاتیانی ئێران و 11 وڵاتی دیکەی ڕۆژهەڵاتی ناوەڕاست و ئەفریقا وەک ئاماژەیەک بۆ "بیرکردنەوەی ڕەگەزپەرەستانە"ـی واشنتۆن ناو دەبات.

 

لێدوانی فەرمی: عەلیڕەزا هاشمی ڕەجا، بەڕێوەبەری گشتیی کاروباری ئێرانیانی دەرەوە لە وەزارەتی دەرەوەی ئێران، لە بەیاننامەیەکدا کە لەلایەن وەزارەتی دەرەوەی وڵاتەکەی بڵاوکراوەتەوە، ڕایگەیاند "بڕیارەکە ئاماژەیەکی ڕوونە لە هەژموونی بیرکردنەوەی سەردەستەخوازی و ڕەگەزپەرەستی لەناو بڕیاربەدەستانی ئەمریکا و دەرخەری دژایەتیی قووڵی درووستکەرانی بڕیارە لە ئەمریکا بەرامبەر بە خەڵکی ئێرانی و موسوڵمان.

 

عەلیڕەزا هاشمی دەڵێت، "بڕیارەکە پێشێلکردنی بنەما سەرەکییەکانی یاسای نێودەوڵەتییانە، کە سەدان ملیۆن خەڵک لە مافی گەشتکردن بێبەش دەکات تەنیا لە سەر بنەمای نیشتمان و ئایینیان."

 

ئەوەی پێویستە بیزانیت: جگە لە ئێران، قەدەغەی گەشت خراوەتە سەر هاوڵاتیانی ئەفغانستان، میانمار، چاد، کۆنگۆ-برازاڤیل، گینای ئیستیوایی، ئەریتریا، هایتی، لیبیا، سۆماڵ، سودان و یەمەن. هەروەها، قەدەغەی گەشتی سنوورداریش بەسەر هاووڵاتیانی حەوت وڵاتی دیکەدا سەپێنراوە.