13 حەجخوازی ئێرانی لە مەککە گیانیان لەدەستداوە

ئاڤا نیوز

ئێران گیانلەدەستدانی 13 حەجخوازی وڵاتەکەی بەهۆی بەرزی پلەی گەرما  لە سعوودیە ڕاگەیاند و ڕاشیگەیاند، زیاتر لە 90 حەجخوازیش ڕەوانەی نەخۆشخانە کراون.

ڕاگەیینراوی فەرمی: میدیاکانی ئێران لە زاری فەرماندەی ئۆپەراسیۆنەکانی تەندروستی مانگی سوور بڵاویان کردەوە: تائێستا بەهۆی گەرماوە 13 حەجخواز گیانیان لەدەستداوە و 96 حەجخوازیش گەیێنراونەتە نەخۆشخانە بەهەمان هۆکاری گەرما.

ئەوەی پێویستە بیزانیت: پلەی گەرما لە شارەکانی سعوودیە لەم چەند ڕۆژەی دواییدا بۆ 47 پلەی سیلیزی بەرزبووەتەوە. فەرمانگەی تەندروستی مانگی سوور داوا دەکات کە حەجخوازان خۆیان لە بەرکەوتنی ڕاستەوخۆی تیشکی خۆر بەدوور بگرن و ئاوی زۆر بخۆنەوە و جلوبەرگی پەمۆیی کاڵ لەبەر بکەن و ئەگەر نیشانەکانی وەک سەرئێشە و دڵ تێکهەڵهاتن و سەرگێژبوون و لێدانی دڵیان لێ دەرکەوت، دەبێت دەستبەجێ سەردانی نزیکترین بنکەی پزیشکی بکەن.