لە خەلیفان شەش كەس بە تۆمەتی فێڵكردن لە هاووڵاتیان دەستگیر دەكرێن

ئاڤا نیوز

ئاسایشی خەلیفان دەستگیرکردنی شەش کەسی ڕاگەیاند، کە بەناوی فرۆشتنی سیمکارتەوە فێڵیان لەخەڵک کردووە و هەژماری بانکییان بەناویانەوە کردووەتەوە.

ڕاگەیێنراوی فەرمی: لە رێکەوتی 17/3/2024 لە لایەن بەڕێوەبەرایەتی ئاسایشی خەلیفان شەش شەش کەس بە تۆمەتی فێلکردن لە هاوڵاتییان دەستگیرکراون، تۆمەتبارەکان لە ڕێگەی  بەخشینی سیمکارتی (زین) و پێدانی بڕی  20 هەزار دینار بە هەرکەسێکی وەرگری سیمکارتەکە و وێنەگرتنی کارتی نیشتیمانی و وێنەی کەسی، لەو رێگەیەوە هەژماری بانکی نهێنییان دروستکردووە.

ئەوەی پێویستە بیزانیت: ئەو ساختەکارانە بەو هۆیەوە پارەیەکی زۆریان خستووەتە سەر ئەم  هەژمارە بانکییانە و بەرەو دەرەوەی وڵاتیان بردوون بەمەبەستی کڕینی دۆڵار بە نرخێکی کەمتر لە عێراق و دواتر هێنانەوە بۆ هەرێمی کوردستان بە ئامانجی فرۆشتنی بە نرخێکی زیاتر، بۆ ئەو مەبەستە پەڕاوی لێکۆلینەوەیان بۆ کراوەتەوە و ڕەوانەی دادگە کراون.

بۆچی گرنگە؟ ئاسایشی خەلیفان داوا لە هاوڵاتییان دەکات هۆشیاربن بەرامبەر ئەم جۆرە فێڵانە ، چونکە لەوانەیە پێدانی کارتی نیشتیمانی و وێنەی خۆیان بۆ چەندین کاری مەترسیدارتر بە کاربهێنرێت و لە داهاتوودا زیانێکی زۆر لەو خاوەن هەژمارە بانکیانە بدات و باج و رسوماتی بانکیی بکەوێتە سەر.