دوو گەنجی عەرەب لە مێرگەپان بەهۆی غازی سۆپاوە گیان لەدەست دەدەن

ئاڤا نیوز

بەرەبەیانی ئەمڕۆ هێزە ئەمنییەكانی سلێمانی، تەرمی دوو گەنجی بە نەتەوە عەرەبیان لە باخێكی سنووری مێرگەپانی سلێمانی دۆزییەوە و بەپێی زانیارییە سەرەتاییەكان بەهۆی غازی ژەهراویی سۆپاوە خنكاون.

زانیاریی بەدەستهاتوو: دوو گەنجی بەنەتەوە عەرەب بە ناوەكانی محەممەد مەحموود ، ڕەزا مووسا، تەمەن 24 ساڵ و 35 ساڵ لە شاری بەغداوە چوونەتە شاری سلێمانی بەمەبەستی كڕینی باخێك لە ناوچەی مێرگەپانی سنووری سلێمانی، دوای ئەوە باخەكەیان كڕیوە، شەو لە باخەكە ماونەتەوە و هەر ئەو شەوە گیانیان لەدەست داوە.

زانیاریی زیاتر: بەپێی زانیارییە سەرەتاییەكان، شەوی چوارشەممەی ڕابردوو، دوو گەنجەكە لە باخەكە ماونەتەوە و بەهۆی سەرماوە شەو سۆپایان هەڵكردووە و نەیانكوژاندووەتەوە، بە هۆی ئەوەی سۆپاكە غازی ژەهراویی دەكردووە، دوو گەنجەكە لەنێو خەودا خنكاون و گیانیان لەدەست داوە.

ئەوەی پێویستە بیزانیت: ماوەی دوو ڕۆژە هێزە ئەمنییەكان و كەسوكاری گەنجەكان سەرقاڵی گەڕانن بەدوای دوو گەنجەكە، بەرەبەیانی ئەمڕۆ تەرمەكانیان لەنێو باخەكەدا دۆزراوەتەوە و گواستراونەتەوە بۆ پزیشكی دادی سلێمانی.