سەرۆكوەزیران مەسرور بارزانی: كەریم شنگالی کەسێکی وەفادار و جێی متمانە بوو

ئاڤا نیوز

سەرۆكوەزیران مەسرور بارزانی، بۆ كۆچی دوایی كەریم شنگالی، وەزیری پێشووی ناوخۆ و ئەندامی پێشووی مەكتەبی سیاسیی پارتی، پەیامێكی هاوخەمی بڵاوكردەوە و دەڵێت، کەسێکی وەفادار و جێی متمانە بوو.

چیرۆکی سەرەکی: ئێوارەی ئەمڕۆ سێشەممە 10-6-2025 کەریم شنگالی، ئەندامی مەکتەبی سیاسی پێشووی پارتی و  وەزیری پێشووی ناوخۆی هەرێمی کوردستان بە نەخۆشی کۆچی دوایی کرد.

پەیامی فەرمی: سەرۆكوەزیران مەسرور بارزانی ڕایگەیاند: هەواڵی کۆچی دوایی خوالێخۆشبوو کەریم شنگالی، وەزیری پێشووی ناوخۆی هەرێمی کوردستان و سەرکردەی دیار و ناسراوی پارتی دیموکراتی کوردستان، زۆر خەمباری کردم.

- کەریم شنگالی لە هەموو قۆناخەکانی خەباتی گەلی کوردستاندا، پێشمەرگەیەکی ماندوونەناسی ئازا و تێکۆشەرێکی ناسراو و کەسایەتییەکی نیشتمانپەروەر بوو، لە هەموو ئەرک و بەرپەرسیاریەتییەکانیدا، زۆر بە دڵسۆزی و لێهاتووییەوە کارەکانی جێبەجێ دەکرد و کەسێکی وەفادار و جێی متمانە بوو.

- پرسە و سەرەخۆشی لە بنەماڵە بەڕێزەکەی و هەموو کەسوکار و دۆست و هەڤاڵەکانی لە پارتی دیموکراتی کوردستان دەکەین. خوای مەزن گیانی بە بەهەشت شاد بکات و سەبر و ئارامییش بە هەموو لایەکمان ببەخشێت.