سوپای پاسداران: دوژمنایەتیمان لەگەڵ ئیسرائیل کۆتایی نایەت

ئاڤا نیوز

فەرماندەی سوپای پاسدارانی ئێران لەبارەی هەڵوێستی وڵاتەکەی بەرامبەت بە ئیسرائیل ئاشکرای دەکات، دوژمنایەتی وڵاتەکەی بەرامبەر ئیسرائیل کۆتایی نایەت.

وێنە گەورەکە: تا دێت گرژییەکانی نێوان ئیسرائیل و ئێران زیاتر دەبێت، سەرەڕای دانوستانی ئێران لەگەڵ ئەمریکا بۆ ڕێککەوتن لەسەر بەرنامە ئەتۆمییەکەی تاران، بەڵام ئیسرائیل بەردەوام هەڕەشەی وەشاندنی گورزی سەربازی لە ئێران دەکات.

لێدوانی فەرمی: حوسێن سەلامی، فەرماندەی سوپای پاسدارانی ئێران ڕایگەیاند، تەنانەت ئەگەر لەسەر پرسی ئەتۆمی بگەینە ڕێککەوتن یان شەڕی غەززە کۆتایی بێت ، دوژمنایەتیمان لەگەڵ ئیسرائیل کۆتایی نایەت، چونکە ئەم شەڕە لەسەر بوون و باوەڕەکانە، هاوکات دەشڵێت، هەڵوێستی ئێران لە دژی ئەمریکا و ئیسرائیل جیاوازە لە هەڵوێستی هەر وڵاتێکی دیکە.

کاریگەری و لێکەوتەکان: ئەمریکا و ئێران بڕیارە لەم ڕۆژانەدا گەڕی شەشەمی دانووستانەکانیان ئەنجامبدەن، هەڕەشەکانی ئیسرائیل بۆ هێرشکردنە سەر ئێران نیگەرانی بۆ لایەنی ئێرانی دروست کردووە، تەنانەت ئیسرائیل ئاشکرای کردووە، لە ئەگەری شکستهێنانی دانووستانەکانی نێوان واشنتن و تاران ئیسرائیل هێرشی خۆی بۆ سەر ئێران ئەنجام دەدات، ئەمەش کاردانەوەی ئەمریکای بەدوای خۆیدا هێنا دەڵێت، نابێت ئیسرائیل کارێکی لەم شێوەیە بکات.

ئەمەش بزانە: بەگوێرەی بەرپرسانی ئێرانی، ڕۆژی یەکشەممەی داهاتوو خولی شەشەم لە شاری مەسقەت بەڕێوەدەچێت، هەرچەندە ئەمریکا دەیەوێت ڕۆژی پێنجشەممە بێت.