بازرگانیی عێراق: بە گەنمی هەرێمی کوردستانەوە ئەمساڵیش دەگەینە ئاستی خۆبژێوی

ئاڤا نیوز

بەڕێوەبەری گشتیی کۆمپانیاکانی دانەوێڵەی عێراق بۆ ئاڤا ئاشکرای دەکات، سەرەڕای ڕێژەی کەمیی وەرگرتنی گەنمی جووتیاران، ئەمساڵیش عێراق بە گەنمی جووتیارانی هەرێمی کوردستانەوە دەگاتە ئاستی خۆبژێوی.

وێنە گەورەکە: ئەمساڵ بەهۆی کەمبارانی، ڕێژەی بەرهەمی کشتوکاڵی و بە دیاریکراوی بەرهەمی گەنم لە هەموو عێراق کەمبووەتەوە بۆیە ڕێژەی وەرگرتنیش لە هەرێمی کوردستان و عێراق کەمیکردووە، سەرەڕای ئەوەش ڕێژەی پێویستی گەنم لە ناوخۆدا بە تەواوی دابین دەکرێت.

لێدوانی فەرمی: د. حەیدەر گەرعاوی، بەڕێوەبەری گشتی کۆمپانیای دانەوێڵەی عێراق میوانی گەشتی هەواڵەکانی 12ـی ئاڤا میدیا بوو و ڕایگەیاند: ئەمساڵ تائێستا سێ ملیۆن و 700 هەزار تۆن گەنممان وەرگرتووە، لە هەرێمی کوردستانیش 400 هەزار تۆن وەردەگرین بەوەش دەبێتە چوار ملیۆن و 100 هەزار تۆن، لەگەڵ ئەو گەنمەی دیکە کە لە پارێزگاکانی کەرکووک، سەڵاحەدین، دیالە و ئەنبار وەریدەگرین، لەوانەیە بگەیەن 4.5 ملیۆن تا پێنج ملیۆن تۆن ئەوەش پێداویستی عێراق بۆ ساڵێک دابین دەکات، کە بۆ ئەمساڵ بۆ ئاستی خۆبژێوی پێویستیمان بە چوار ملیۆن و 700 هەزار تۆن گەنم هەیە.

ژمارەکان وا دەڵێن: ئەمساڵ پڕۆسەکە لە سلێمانی و دهۆک دەستیپێکردووە و سبەی پێنجشەممە لە هەولێریش دەستپێدەکات، پشکی پارێزگاکانی هەرێمی کوردستان بەمجۆرە دیاریکراوە:

هەولێر: 122 هەزار و 600 تۆن
سلێمانی: 145 هەزار و 567 تۆن
دهۆک: 117 هەزار و 911 تۆن
هەڵەبجە: 13 هەزار و 923 تۆن

ئەوەی پێویستە بیزانیت: ساڵی ڕابردوو حکومەتی عێراق شەش ملیۆن و 300 هەزار تۆن گەنمی لە جووتیارانی عێراق و هەرێمی کوردستان وەرگرت و 700 هەزار تۆن بۆ هەرێمی کوردستان دیاری کرا بوو، بەڵام ئەمساڵ ڕێژەی وەرگرتن کراوەتە 400 هەزار تۆن.