عەلی حەمەساڵح: تاڵانییەکی مەترسیداری زەوی لە سلێمانی دەستی پێکردووە

ئاڤا نیوز

عەلی حەمەساڵح دەڵێت، "سێ مانگە سەرقاڵی لێکۆڵینەوەم، 312 بەڵگەم کۆکردوەتەوە، هیچ تاڵانی و یاساشکێنی و وێرانکردنێکی شارم نەدیوە لەمە گەورەتر بێت". گروپێکی شەش کەسی بە ناوی هێزی پێشمەرگە و ئەمنییەوە خەریکی تاڵانی زەوین لە سلێمانی.

چیرۆکی سەرەکی: بڕیاردەری ڕەوتی هەڵوێست کەیسێکی نوێیی تاڵانکردنی زەوی لە سنووری پارێزگای سلێمانی ئاشکرا دەکات. بە وتەی ئەو، گرووپە شەش کەسییەکە زەوی لە جووتیاران وەردەگرنەوە، کەسێک بە ناوی (خەڵەف) نەخشەی بۆ دادەنێت، کەسێکی دیکە بە ناوی (مووسا) بە ناوی فەرماندەییەوە دەیکاتە فۆرم، کۆمپانیایەکیش بە ناوی (مادان) لە سەرچنار سەرپەرشتی دەکات، جگە لەوە بەشێکی تری ئەم کارانە لە “بینای پاشا” خوار مەرکەزی چوارچرا دەکرێ.

لێدوانی فەرمی: عەلی حەمەساڵح، سەرۆکی ڕەوتی هەڵوێست لە هەژماری خۆی لە تۆڕی کۆمەڵایەتیی فەیسبووک نووسیویەتی، گروپێکی شەش کەسی بەبێ ئەوەی هیچ فەرمانێکی وەزارییان پێ بێت، بە ناوی پێشمەرگە و هێزی ئەمنییەوە تا ئێستا 80 هەزار پارچە زەوییان فرۆشتووە کە بەهاکەیان یەک ملیار دۆلارە و هەموو هەفتەیەک 500 پارچە زەوی بۆ فرۆشتن دەخەنە بازاڕاوە کە هەفتانە پێنج بۆ شەش ملیۆن دۆلار داهاتی هەیە.

عەلی حەمەساڵح دەڵێت: ناوی هەموو کەس و بەرپرس و شارەوانییەکانم لەلایە کە تێوەگلاون لەم کەیسە. هاوکات ناوی ئەو شوێنانەش بڵاودەکاتەوە کە گرووپە شەش کەسییەکە هەموو زەوییەکانیان فرۆشتووە: 

- لە سائیب سیتی تا شەقامی 100 مەتری.

- سەر شەقامی 100 مەتری.

- قڕگە، ڕاپەڕین، قولە ڕەیسی، کەنەکەوە، بەکرەجۆ، سووتکە، کانی گۆمە، چواچرا و زەوی قەرەجەکان.

لەلایەکی دیکەوە: لەسەر ئەم کەیسە ئاڤا میدیا پەیوەندی کرد بە لەیلا عومەر، سەرۆکی شارەوانی سلێمانی، بەڵام وەڵامی پەیوەندییەکانی نەدایەوە. لە هەمان کاتدا زەردەشت ڕەفیق، وتەبێژی شارەوانی سلێمانی وتی، "لە دەرەوەی وڵاتم و ئاگاداری هیچ بابەتێک نیم".