سبەی یەكەم كاروانی حاجییان بەڕێدەكەون و دوای دوو ڕۆژ دەگەنەوە كوردستان

ئاڤا نیوز

سبەی یەكەم كاروانی حاجییانی كوردستان لە سعوودیەوە بەرەو هەرێمی كوردستان بەڕێگەی وشكانی بەڕێدەكەون و دوای دوو ڕۆژ دەگەنە هەرێمی كوردستان، بڕیاریشە تا 20ـی ئەم مانگە سەرجەم حاجییانی هەرێمی كوردستان بگەڕێنەوە.

لێدوانی فەرمی: كاروان ستۆنی، وتەبێژی بەڕێوەبەرایەتیی حەج و عومرەی هەرێمی كوردستان تایبەت بە ئاڤا ڕایگەیاند، سبەی پێنجشەممە 12ـی حوزەیرانی 2025، یەكەم كاروانی حاجییانی هەرێمی كوردستان لەڕێگەی وشكانییەوە لە خاكی سعوودیەوە بەڕێ دەكەون و دوای دوو ڕۆژ واتە لە 14ـی حوزەیران، دەگەنەوە خاكی هەرێمی كوردستان كە پێكهاتوون لە حاجییانی پارێزگاكانی سلێمانی و هەڵەبجە، هەردوو ئیدارەی گەرمیان و ڕاپەڕین، هەمان ڕۆژ چەند كاتژمێرێك دواتر، حاجییانی هەولێر و دهۆك و ئیدارەی زاخۆ و سۆرانیش دەگەن.

وتەبێژی حەج و عومرەی هەرێمی كوردستان ڕوونیشی كردەوە، هەر هەمان ڕۆژی گەیشتنەوەی یەكەم كاروان بەڕێگەی وشكانی، یەكەم كاروانی حاجییان بەڕێگەی ئاسمانی لە 14ـی حوزەیران دەگەڕێنەوە هەرێمی كوردستان، بۆ هەردوو فرۆكەخانەی نێودەوڵەتیی هەولێر و سلێمانی.

ئەوەی پێویستە بیزانیت: ئەمساڵ هەزار و 646 حاجیی هەرێمی كوردستان لەڕێگەی وشكانییەوە بەشداری فەریزەی حەجیان كردووە، سێ هەزار و 490 حاجیش بەڕێگەی ئاسمانی گەشتیان كردووە، كۆی ژمارەی حاجیانی كوردستان پێنج هەزار و 136 كەسە.