هەواڵی گیانلەدەستدانی ئەیاد عەللاوی ڕەت دەکرێتەوە

ئاڤا نیوز

هەواڵی گیانلەدەستدانی سەرۆکوەزیرانی پێشووتری عێراق و سەرۆکی هاوپەیمانی وەتەنییە ڕەتدەکرێتەوە و باڵیۆزی عێراقیش لە ئوردن ئاماژە بۆ ئەوە دەکات ناوبراو نەخۆشەو سەردانی نەخۆشخانەی کردووە بۆ چارەسەر.

چیرۆکی سەرەکی: ئەمڕۆ پێنجشەممە 2025-6-12، بەشێکی زۆر لە ماڵپەڕە هەواڵییەکان و هاووڵاتیانی ئاسایی هەواڵی گیانلەدەستدانی ئەیاد عەللاوی، سەرۆکی هاوپەیمانی وەتەنییە و سەرۆکوەزیرانی پێشووتری عێراقیان بەهۆی جەڵتەیەکی مێشک لە نەخۆشخانەیەکی ئوردن بڵاوکردەوە.

لێدوانی فەرمی: دکتۆر عومەر بەرزنجی، باڵیۆزی عێراق لە ئوردن بە ئاڤا میدیای ڕاگەیاند: هەواڵی گیانلەدەستدانی ئەیاد عەلاوی، سەرۆکی هاوپەیمانی وەتەنییە و سەرۆکوەزیرانی پێشوتری عێراق دوورە لە ڕاستیەوە.

زانیاریی زیاتر: بە گوتەی بەرزنجی، دۆخی تەندروستیی ناوبراو تەواو نییە، بۆ ئەو مەبەستەش سەردانی نەخۆشخانەی کردووە بۆ وەرگرتنی چارەسەر.

لەلایەکی دیکەوە: کەسێکی نزیک لە عەللاوی ڕایگەیاند، کە دۆخی تەندروستیی ناوبراو باشە و دوای 10 ڕۆژی دیکە دەگەڕێتەوە بەغدا.

ئەوەی پێویستە بیزانیت: دوای کۆچی دوایی حەمزەی کوڕی، ئەیاد عەللاوی، سەرۆکوەزیرانی پێشووتری عێراق، بەهۆی خەم و پەژارەوە تووشی دۆخێکی دەروونیی خراپ ببوو، تووشی شۆکێکی گەورە ببوو.