بەریتانیا لەبارەی هێرشی ئیسرائیل بۆ سەر ئێران: ساتێکی مەترسیدارە

ئاڤا نیوز

 

بەریتانیا هێرشی ئیسرائیل بۆ سەر ئێران بە مەترسی وەسف دەکات و سەرۆکوەزیرانی ئەو وڵاتە دەڵێت، ئێستا کاتی دانبەخۆداگرتنە.


چیرۆکی سەرەکی: بەرەبەیانی ئەمڕۆ ئیسرائیل هێرشێکی فراوان و وردی کرد سەر چەندین شار و ژمارەیەک دامەزراوەی گرنگیشی بە ئامانج گرت کە بەهۆیانەوە ژمارەیەک فەرماندەی باڵا و شەش زانای ئەتۆمی ئەو وڵاتەی کوشت.

 

لێدوانی فەرمی: کییەر ستارمەر، سەرۆکوەزیرانی بەریتانیا، سەبارەت بە هێرشەکەی ئیسرائیل بۆ سەر ئێران ڕایگەیاند، "ئێستا کاتی دانبەخۆداگرتن، هێمنی و گەڕانەوەیە بۆ دیپلۆماسی."


- ستارمەر لە بەیاننامەیەکدا داوای لە هەموو لایەنەکان کرد دان بە خۆیاندا بگرن و بە خێرایی گرژییەکان کەم بکەنەوە. ئەو گوتیشی "دەبێت سەقامگیریی ڕۆژهەڵاتی ناوەڕاست لەپێشینە بێت و ئێمە داوا لە هەموو لایەک دەکەین گرژییەکان کەم بکەنەوە."


لەلایەکی دیکەوە: هاوکات دیڤید لامی، وەزیری دەرەوەی بەریتانیا، ڕایگەیاند ئەمە ساتێکی مەترسیدارە و سەقامگیریی ڕۆژهەڵاتی ناوەڕاست بۆ ئاسایشی جیهانی گرنگە و هەڕەشەی سەر ئاسایش و سەقامگیریی ناوچەکە لە بەرژەوەندیی هیچ لایەنێکدا نییە.