دۆناڵد تڕەمپ: هۆشداریم دا بە ئێران بەڵام گوێیان پێنەدا و شكستیان هێنا

ئاڤا نیوز


دۆناڵد تڕەمپ، سەرۆكی ئەمریكا پەیامێكی سەبارەت بە هێرشەكەی بەرەبەیانی ئەمڕۆی ئیسرائیل بۆ سەر ئێران بڵاوكردەوە و ئاشكرای دەكات كە پێشتر هۆشداریی داوەتە ئێران كە دۆخەكە خراپتر دەبێت، دەشڵێت هێشتا كات لەبەردەم ئێران ماوە بۆ ڕێككەوتن.

چیرۆکی سەرەکی: بەرەبەیانی ئەمڕۆ سوپای ئیسرائیل هێرشێکی فراوانی کرد سەر چەندین دامەزراوە و شوێنی نیشتەجێبوونی فەرماندە باڵاکانی سوپای پاسدارانی ئێران ژمارەیەک بەرپرس و زانای ئەتۆمی ئەو وڵاتەی کوشت. 

لێدوانی فەرمی: دۆناڵد ترەمپ، سەرۆکی ئەمریکا دوای هێرشەکانی ئیسرائیل بۆ سەر ئێران ڕاگەیاند: زۆر بە ئێرانم گوت با بگەینە ڕێککەوتن، هەرچەندە نزیکبوونەوە هەبوو بەڵام نەیانتوانی، ئەوەم بە ئاشکرایی پێگوتن کە دۆخەکە خراپتر دەبێت، بەشێک لە تووندڕەوەکانی ئێران زۆر ئازایانە قسەیان دەکرد و نەیان دەزانی کە چی ڕوودەدات. 

بەشێکی دیکە لە پەیامەکەی دۆناڵد ترەمپ:- 

 

- ئێستا کوشن و وێرانکاری زۆر ڕوویداوە بەڵام هێشتا کات ماوە بۆ کۆتاییهێنان بەم کوشتارە. 

- من دەرفەت لەدوای دەرفەتم بە ئێران دا بۆ ئەوەی ڕێكبكەوێت، ئاگادارم كردنەوە كە ڕێككەوتن بكەن بەڵام گوێیان بە وتەكانمان نەدا و شكستیشیان هێنا.

- من پێشتر هۆشدارییم بە ئێران دا كە دۆخەكە خراپتر دەبێت، ئەمە ئەوە بوو كە ڕوویدا.

- ئەمەریکا باشترین و کوشندەترین جۆری چەک دروست دەکات، ئیسرائیلیش خاوەنی چەندین چەکی پشکەوتووە.

- هەندێک لە توندڕەوە ئێرانییەكان زۆر بە تووندی قسەیان دەكرد، بەڵام ئێستا كوژران و وێرانكاریی زیاتریش بەڕێوەیە.

- هێشتا دەرفەت لەبەردەم ئێران ماوە و دەتوانێت ڕێككەوتن بكات، پێویستە لەسەر ئێران هەنگاو بنێت بۆ ئەوەی ئیمپراتۆریەتەكەی ڕزگاری بێت، پێویستە ڕێككەوتن بكەن پێش ئەوەی درەنگ بێت.