ڕۆژنامەیەکی ئەمریکی: ئیسماعیل قائانی لە هێرشی ئیسرائیل کوژراوە

ئاڤا نیوز

 

ڕۆژنامەی نیۆیۆرک تایمزی ئەمریکی لە زاری سەرچاوەیەکەوە بڵاویکردەوە، ئیسماعیل قائانی، فەرماندەی فەیلەقی قودسی ئێران لە هێرشەکانی ئیسرائیل کوژراوە.

 

چیرۆکی سەرەکی: بەرەبەیانیی ڕۆژی هەینی ئیسرائیل لەڕێگەی 200 فڕۆکەی جەنگی هێرشی کردە سەر بنکە ئەتۆمییەکانی ئێران و شوێنی مانەوەی زانا ئەتۆمییەکان و سەرکردە سەربازییەکان، لە ئەنجامدا دەیان بنکەی ئەتۆمی خاپوور کرد و دەیان زانا و سەرکردەی سەربازی کوشت.

 

بۆچوونی لایەنی بەرامبەر: پێشتر بەرپرسانی ئێران ڕایانگەیاندبوو کە ناوبراو سەلامەتە و نەکوژراوە.

 

زانیاریی زیاتر: ئیسماعیل قائانی لە ساڵی 1957 لە شاری مەشهەد لە ئێران لەدایکبووە، پێنج ساڵ پێش ئێستا و دوای کوژرانی قاسم سولەیمانی لە ساڵی 2020 لەلایەن ئەمریکا، کرایە فەرماندەی فەیلەقی قودسی ئێران.

 

ئەوەی پێویستە  بیزانیت: لە تۆڵەی هێرشەکانی بەرەبەیانی ئەمڕۆ، ئێران هێرشی مووشەکی بۆ سەر ئیسرائیل دەستپێکرد و هێرشەکە چەند قۆناغێک لەخۆدەگرێت.

ئەوەی ئێستا ڕوودەدات: نوێترین زانیارییەکان لەبارەی هێرشە مووشەکییەکەی ئێران ئەمانەن:

٠ تاوەکو ئێستا ئێران سێ کاروان مووشەکی ئاراستەی ئیسرائیل کردوون. سوپای ئیسرائیل لەڕێگەی سیستەمی بەرگرییەوە بەرپەرچی مووشەکەکان دەداتەوە.

٠ کاروانی یەکەم 100 مووشەک بوون و زۆربەی مووشەکەکان لەلایەن سیستمی بەرگری ئیسرائیل تێکشکێنران.

٠ دووەم کاروانی مووشەکەکانی ئێران 150 مووشەکی لەخۆدەگرت.

٠ کاروانی سێیەمی مووشەک لەلایەن ئێران ئاراستەی ئیسرائیل کرا و تاوەکو ئێستا ژمارەی مووشەکەکان و زیانەکان ئاشكرا نەکراون.