هێرشی تۆڵەی ئێران دەستیپێکرد؛ سەدان مووشەکی ئاراستەی ئیسرائیل کرد

ئاڤا نیوز

لە تۆڵەی هێرشەکانی بەرەبەیانی ئەمڕۆ، ئێران هێرشی مووشەکی بۆ سەر ئیسرائیل دەستپێکرد و هێرشەکە چەند قۆناغێک لەخۆدەگرێت.

وێنە گەورەکە: دوای هێرشەکانی بەرەبەیانیی ئەمڕۆی ئیسرائیل بۆ سەر خاکی ئێران و کوشتنی سەرکردە سەربازییەکانی ئێران و وێرانکردنی چەند پێگەیەکی ئەتۆمیی ئێران، ئێران وەڵامی هێرشەکانی دایەوە و سەدان مووشەکی بالیستیکی ئاراستەی تەلئەڤیڤ کرد.

ئەوەی ئێستا ڕوودەدات: نوێترین زانیارییەکان لەبارەی هێرشە مووشەکییەکەی ئێران ئەمانەن:

٠ تاوەکو ئێستا ئێران سێ کاروان مووشەکی ئاراستەی ئیسرائیل کردوون. سوپای ئیسرائیل لەڕێگەی سیستەمی بەرگرییەوە بەرپەرچی مووشەکەکان دەداتەوە.

٠ کاروانی یەکەم 100 مووشەک بوون و زۆربەی مووشەکەکان لەلایەن سیستمی بەرگری ئیسرائیل تێکشکێنران.

٠ دووەم کاروانی مووشەکەکانی ئێران 150 مووشەکی لەخۆدەگرت.

٠ کاروانی سێیەمی مووشەک لەلایەن ئێران ئاراستەی ئیسرائیل کرا و تاوەکو ئێستا ژمارەی مووشەکەکان و زیانەکان ئاشكرا نەکراون.

٠ بەپێی میدیاکانی ئیسرائیل ژمارەیەک مووشەک لە تەلئەڤیڤ کەوتوونەتە خوارەوە و ئامانجەکەیان پێکاوە، دەگوترێت 7 بۆ 9 مووشەک ئامانجەکەیان پێکاوە. یەکێکیان لە نزیک باڵەخانەی وەزارەتی ئاسایش و بەرگریی ئیسرائیل کەوتووەتە خوارەوە و ئاگرێکی گەورە کەوتووەتەوە.

٠ بەهۆی هێرشە مووشەکیەکانی ئێران، زەنگی ئاگادار کردنەوە لە زۆربەی شارەکانی ئیسرائیل لێدراوە.

٠ دەنگی چەند تەقینەوەیەکی گەورە لە تەلئەڤیڤ دەبیسترێت و ئاگر لە چەند ناوچەیەک کەوتووەتەوە.

٠ سوپای ئیسرائیل: 150 مووشەکمان لە ئەسفەهانەوە ئاراستە کراوە.

زانیاریی بەدەستهاتوو: میدیاکانی ئیسرائیل بڵاویان کردەوە، ئەمریکا و فەرەنسا پاڵپشتی ئیسرائیلیان کردووە و بەرپەرچی مووشەکەکانی ئێرانیان داوەتەوە.

بۆچوونی لایەنی بەرامبەر: سوپای ئیسرائیل دەڵێت، دەتوانین بەرپەرچی هەموو هێرشەکان بدەینەوە و پێویستمان بە هاوپەیمانەکانمان نییە. ئەمە لەکاتێکدایە ئەمریکا هاوکاری ئیسرائیلی کردووە لە بەرپەرچدانەوەی هێرشەکان.

لەلایەکی دیکەوە: کەناڵ 12ـی ئیسرائیل لە زاری بەرپرسێکی ئیسرائیل بڵاویکردەوە، هەر مووشەکێک ئاراستەی ئیسرائیل بکرێت، هێرشی دەستبەجێ بۆ سەر ژێرخانی نیشتمانی ئێران دەستپێدەکات.

زیانە سەرەکییەکان: میدیاکانی ئیسرائیل بڵاویان کردووەتەوە، لە ئاکامی هێرشەکەدا 26 کەس لە ئیسرائیل برینداربوون.