لە بەغدا دەنگی تەقینەوە دەبیسترێت و لەدیوانییەش پاشماوەی مووشەکێک دەکەوێتە خوارەوە

ئاڤا نیوز

بەرەبەیانی ئەمڕۆ دەنگی چەندین تەقینەوەی یەک لەدوای یەک لەبەغدای پایتەخت بیستراوە، هاوکات لەشاری دیوانییەش پاشماوەی مووشەکێک دەکەوێتە سەر گەڕەکێکی ئەوشارە، هاوکات بەرپرسانی بەرگری ئاسمانی عێراق ڕەتیدەکەنەوە کە هیچ شوێنێک لە عێراق کرابێتە ئامانج.

چیرۆکی سەرەکی:  بەرەبەیانی ڕۆژی هەینی 13-6-2025 ئیسرائیل هێرشێکی بەرفراوانی کردە سەر دامەزراوە ئەتۆمییەکانی ئێران و ماڵی چەندین سەرکردەی سوپای پاسدارانیشی بە ئامانج گرت لەبەرامبەردا ئێران دەیان درۆنی ئاڕاستەی ئیسرائیل کرد، هەردوولاش ئاسمانی عێراقیان بەزاندووە لەو هێرشانەدا. 

لێدوانی فەرمی: سەرچاوەیەک لە پارێزگای دیوانیە بە ئاڤا میدیا ڕاگەیاند، پاشماوەی مووشەکێک کەوتە سەر خانوویەکی نیشتەجێبوون لە شاری دیوانییە، جگە لەزیانی ماددی هیچ زیانێکی گیانی لێنەکەوتووەتەوە.

 ڕاگەیێنراوی فەرمی: بەپێی سەرچاوەکە، خانووەکە دەکەوێتە گەڕەکی فوڕاتی شاری دیوانییە و تاوەرێکی پەیوەندییەکانی یەکێک لە کۆمپانییاکانی ئینتەرنێت و تانکییەکی سووتەمەنی لەسەر بووە، هەر ئەوەش بووەتە هۆی هەڵگیرسانی ئاگرەکە.

 
به‌ته‌نیشت ئه‌م بابه‌ته‌وه‌: بەشێک لەمیدیاکانی عێراق بڵاویان کردووەتەوە، بەرەبەیانی ئەمڕۆ دەنگی چەندین تەقینەوەی یەک لەدوای یەک لەبەغدای پایتەخت بیستراوە، ئەمەش لە کاتێکدایە خەڵکی عێراق تووشی دڵەڕاوکێیەکی زۆر بوونە بەهۆی پەرەسەندنی گرژییەکانی نێوان ئێران و ئیسرائیل.

زانیاریی بەدەستهاتوو: بەگوێرەی سەرچاوەیەکی ئەمنی، ئەو دەنگانەی کە بیستراون دەرئەنجامی تێپەڕبوونی مووشەکی دوورە مەودای ئێران و ئیسرائیلە کە بەهەردوو  حاڵەت ئەو مووشەکانە بە ئاسمانی عێراقدا تێدەپەڕن.

لەلایەکی دیکەوە: بەرپرسانی بەرگری ئاسمانی عێراق ڕەتیدەکەنەوە کە هیچ شوێنێک لە عێراق لەم نێوەندەدا کرابێتە ئامانج  .